الماتى قالاسىنىڭ باس سانيتارلىق دارىگەرى جاڭا قاۋلىعا قول قويدى. بۇل تۋرالى Qamshy.kz اقپارات اگەنتتىگى حابارلايدى. 

جانداربەك بەكشيننىڭ 2020 جىلعى 4 قازانداعى №62 قاۋلىسىنا سايكەس، ەرتەڭنەن باستاپ (6-قازاننان) الماتىداعى تەاترلاردىڭ جۇمىس ىستەۋىنە رۇقسات بەرىلدى. الايدا زالداعى اراقاشىقتىقتى ساقتاي وتىرىپ، ورىن سانىنىڭ جارتىسىن عانا قامتۋعا بولادى. ونىڭ وزىندە كورەرمەن الدىمەن infokazakhstan.kz سايتىندا تىركەلۋى شارت. ال مادەني وبەكتىلەردىڭ قىزمەتكەرلەرى ۇزدىكسىز جەلدەتۋدى قامتاماسىز ەتۋگە مىندەتتى.

سونىمەن قاتار، مەگاپوليستە تەحنيكالىق قىزمەت كورسەتۋ ستانسيالارى، اۆتوكولىك جۋۋ ورىندارى، اياق كيىم دۇكەندەرى، حيميالىق تازارتقىشتار مەن تۇرمىستىق تەحنيكانى جوندەيتىن كومپانيالاردىڭ جۇمىس ۋاقىتى ۇزارتىلدى. ەندى ولار تاڭعى ساعات 10-نان ءتۇن ورتاسىنا دەيىن قىزمەت كورسەتە الادى.

وعان قوسا، ۇجىمدىق ءىس-شارالار (توي) وتكىزىلمەگەن جاعدايدا تاماقتاندىرۋ پۋنكتتەرىنىڭ جۇمىسىنا رۇقسات ەتىلدى.

كارانتين رەجيمىنىڭ جەڭىلدەتىلگەنىنە قاراماستان بۇرىنعى تالاپتار ساقتالادى. اتاپ ايتقاندا، دەنە قىزۋى جوعارىلاعان ادامداردىڭ وقشاۋلانۋىن قامتاماسىز ەتۋ كەرەك. اۋەكومپانيالارىنىڭ باسشىلارىنا جانە الماتى حالىقارالىق اۋەجايىنىڭ اكىمشىلىگىنە اۋرۋحاناعا كارانتينگە جاتقىزىلاتىن ادامداردىڭ قونۋىن جانە ولاردىڭ بولىمشەلەرىندە سانيتارلىق نورمالاردىڭ ساقتالۋىن قامتاماسىز ەتۋ جۇكتەلگەن.