"قامشى" رەداكسياسىنا الماتى وبلىسى اقسۋ اۋدانى قىزىلاعاش اۋىلىنىڭ كاماش نۇردانبەك ەسىمدى تۇرعىنى جوعالعان جيىرما ءىرى قارانى ىزدەۋگە جەرگىلىكتى پوليسيا قىزمەتكەرلەرى قۇلىق تانىتپاي وتىرعانىن ايتىپ حابارلاستى. ونىڭ سوزىنشە، پوليسيا قىزمەتكەرلەرى و باستا "جوعالعان مال تابىلدى، قىلمىسكەرلەر ۇستالدى" دەپ حابارلاپ، ارتىنشا سوزدەرىنەن تايقىپ، شاتاسقاندارىن جەتكىزگەن. "جەرگىلىكتى ىشكى ىستەر بولىمىنەن قايىر بولمادى" دەگەن ازامات ىشكى ىستەر ءمينيسترى، باس پروكۋرور جانە الماتى وبلىسىنىڭ اكىمىنەن كومەك سۇرايدى. ماسەلەنىڭ تولىق ءمان-جايى وقىرمان حاتىندا بايان ەتىلگەن.

ق ر ىشكى ىستەر ءمينيسترى ە.ز. تۇرعىمبايەۆقا؛

ق ر باس پروكۋرورى ع.د. نۇرداۋلەتوۆكە؛

الماتى وبلىسىنىڭ اكىمى ا.ع. باتالوۆقا

ارىز

مەن كاماش نۇردانبەك – الماتى وبلىسى اقسۋ اۋدانى قىزىلاعاش اۋىلىنداعى دالعابايەۆ كوشەسى №17ء-ۇيدىڭ تۇرعىنىمىن.

2019 جىلدىڭ 22 شىلدەسىندە مەنىڭ قورامنان جيىرما باس ءىرى قارا ۇرلاندى. مەنىڭ شاعىمىم بويىنشا اتالعان دەرەك №191932031000401 قىلمىستىق ءىس رەتىندە اقسۋ اۋداندىق پوليسيا بولىمىنە تىركەلگەن. الايدا پوليسيا قىزمەتكەرلەرىنىڭ جاساعان جۇمىستارىنىڭ  ناتيجەسى وڭدى بولماي وتىر. ولار الدىمەن "مال تابىلدى، ۇرىلار ۇستالدى" دەپ الىپ، كوپ ۇزاماي سوزدەرىنەن جالتارىپ، "مالدى تاپپادىق، شاتاسىپپىز، تابىلعان مال باسقا بىرەۋدىكى ەكەن" دەپ وتىر. ارتىنشا ىزدەۋ جۇمىستارى مۇلدە توقتاتىلعان.

مالىمىزدى "تابىلدى" دەپ الىپ، ارتىنشا سوزدەرىن قايتىپ الۋى ءتۇرلى بوتەن ويلارعا جەتەلەيدى. ەلىمىزدە مال ۇرلىعى بويىنشا زاڭ قاتاڭداتىلىپ جاتقاندا، جەرگىلىكتى پوليسەيلەردىڭ بۇل ارەكەتىن تۇسىنە المادىق.

مال ۇرلىعى ءۇشىن جازانى كۇشەيتۋدى مەملەكەت باسشىسى قاسىم-جومارت كەمەل ۇلى توقايەۆتىڭ ءوزى 2019 جىلدىڭ قازان ايىندا تاپسىرعان بولاتىن.

ال 27 جەلتوقساندا پرەزيدەنت قول قويعان ءبىرقاتار زاڭمەن بىرگە "مال ۇرلىعىنا" قاتىستى باپ تا بار. ماسەلەن، قىلمىستىق كودەكستىڭ 188-بابىنا تومەندەگىدەي وزگەرىس ەنگەن:

188-1-باپ. مال ۇرلاۋ

1. مال ۇرلاۋ، ياعني بوتەننىڭ مالىن جاسىرىن جىمقىرۋ – مۇلكى تاركىلەنىپ، ءۇش مىڭ ايلىق ەسەپتىك كورسەتكىشكە دەيىنگى مولشەردە ايىپپۇل سالۋعا نە سول مولشەردە تۇزەۋ جۇمىستارىنا، نە بەس جىلعا دەيىنگى مەرزىمگە باس بوستاندىعىن شەكتەۋگە، نە سول مەرزىمگە باس بوستاندىعىنان ايىرۋعا جازالانادى؛
2. 2) ءىرى مولشەردە جاسالعان مال ۇرلاۋ – مۇلكى تاركىلەنىپ، ءۇش جىلدان جەتى جىلعا دەيىنگى مەرزىمگە باس بوستاندىعىنان ايىرۋعا جازالانادى.
3. 2) تۇرعىن ءۇي-جايدىڭ، كاسىپورىننىڭ، ۇيىمنىڭ، مەكەمەنىڭ، مال قورانىڭ، قاشانىڭ نەمەسە وزگە دە قويمانىڭ اۋلاسىنا كىرۋمەن جاسالعان مال ۇرلاۋ –  مۇلكىم تاركىلەنىپ، بەس جىلدان ون جىلعا دەيىنگى مەرزىمگە باس بوستاندىعىنان ايىرۋعا جازالانادى.
4. 2) 2) اسا ءىرى مولشەردە جاسالعان مال ۇرلاۋ – مۇلكى تاركىلەنىپ، جەتى جىلدان ون ەكى جىلعا دەيىنگى مەرزىمگە باس بوستاندىعىنان ايىرۋعا جازالانادى.

كورىپ وتىرعانىمىزداي زاڭ قاتاڭداتىلعان. اۋىلدا مالى ۇرلانىپ، جەر سيپاپ قالعان جالعىز مەن عانا ەمەس. ءبىز زاڭنىڭ كۇشەيۋىنە بايلانىستى قىلمىسكەرلەر پوليسيا قىزمەتكەرلەرىنىڭ "اۋزىن مايلاپ"، ءىستى جىلى جابۋعا كۇش سالىپ وتىر ما دەپ الاڭدايمىز. ارينە، ءبىز پوليسەيلەرىمىز ادال قىزمەت اتقاراتىنىنا سەنگىمىز كەلەدى. دەسەك تە، قۇنى 5-6 ميلليون شاماسىنداعى 20 باس ءىرى قارا تابىلسا دا، سىبايلاستىقپەن جوق بولىپ كەتۋ ءقاۋپى بار.

ازىن اۋلاق مالىمىزبەن جان باعىپ، كۇن كورىپ وتىرعان ءبىز سياقتى قاراپايىم شارۋالارعا وسى زاڭ عانا مەدەت بەرىپ وتىر. سىزدەردەن ءتيىستى قۇزىرلى مەكەمەلەر ارقىلى جوعارىدان تەكسەرىستەر جۇرگىزىپ، كومەك كورسەتۋلەرىڭىزدى سۇرايمىز!

قۇرمەتپەن: كاماش نۇردانبەك