قازاقستاننىڭ ىشكى ىستەر ءمينيسترى ەرلان تۇرعىمبايەۆ تۇركىستان وبلىسىندا ءوز بالاسىن ۇرىپ-سوققان ەر ادامنىڭ ارەكەتىنە پىكىر ءبىلدىردى.
– كەز كەلگەن قۇقىق بۇزعان ادام زاڭ الدىندا جاۋاپ بەرۋى ءتيىس. بۇنداي الىمجەتتىك كورسەتۋ فاكتىلەرى اياقسىز قالمايدى. زاڭ بارىنە ورتاق. تۇرمىستىق جانجال سالاسىنا قاتىستى قۇقىق بۇزۋشىلىق جانە قىلمىس ءبىرجاقتى بولمايدى، ونىڭ ەكىنشى جاعى بولاتىندىعىنا نازار اۋدارعىم كەلەدى.
تۇركىستان وبلىسىنداعى جاعدايعا كەلسەك، بالالاردىڭ اناسى بۇعان دەيىن دە كۇيەۋىنىڭ ۇستىنەن بىرنەشە رەت شاعىم تۇسىرگەن، ءبىراق ارىز جازباعان. ول ونىڭ زاڭدى ايەلى، كۇيەۋىنەن اجىراسۋعا ءوتىنىش بەرمەگەن. بۇل جەردە پوليسەيلەردىڭ جۇمىسىن ايقىندايتىن وزىندىك زاڭنامالىق تۇستار بار. ياعني، ءبىز شاعىمسىز ول ايەلدىڭ جولداسىن 3 ساعاتتان ارتىق قاماۋدا ۇستاي المايمىز. سونداي-اق، سەبەپسىز اكىمشىلىك جاۋاپكەرشىلىككە دە تارتا المايمىز، – دەدى تۇرعىمبايەۆ.
ەسكە سالا كەتەيىك، 4 قازان كۇنى الەۋمەتتىك جەلىدە ەر ادامنىڭ كامەلەتكە تولماعان بالانى ۇرىپ-سوعىپ جاتقان ۆيدەوسى جاريالانىپ، رەزونانس تۋدىرعان.
پىكىر قالدىرۋ