قازاقستاندىقتار secure.avaaz.org سايتىندا بريتانيالىق كوميك ساشا باروننىڭ "بورات-2" ءفيلمىنىڭ كورسەتىلۋىنە قارسى پەتيسيا جاريالادى. قازىرگى تاڭدا پەتيسياعا 104 مىڭعا جۋىق ادام قول قويعان.

پەتيسيا اۆتورىنىڭ سوزىنشە، فيلم راسيزم مەن كسەنوفوبياعا تولى.

"ولار قازاقستان مەن قازاق حالقىنىڭ ار-نامىسىن قورلاپ وتىر. ونىڭ ۇستىنە فيلم كادرلارى شىنايى جاعدايمەن ەش سايكەس كەلمەيدى. فيلم اۆتوردىڭ قيالىنان تۋعان ەلدە تۇسىرىلگەن بولسا، ءبىرسارى. ءبىراق ولاي ەمەس. بۇل فيلم شىن مەملەكەتتى، ول جەردەگى ازاماتتاردى كەلەمەجدەيدى. اتالعان فيلم ۇلى تاريحى بار ۇلى ەلدىڭ ازاماتتارى ءۇشىن جاڭا پروبلەما تۋدىرادى. شەتەلدىكتەرگە ءفيلمنىڭ ءازىل ەكەنىن ۇدايى تۇسىندىرۋگە تۋرا كەلەدى. كورىپ تۇرعانىمىزداي، شىن مانىندە بۇل (فيلم اۆتورىنىڭ ارەكەتى – رەد.) ءازىلدى ەمەس، ەلگە دەگەن قۇرمەتسىزدىكتى كورسەتەدى" دەدى اۆتور جازباسىندا.

پەتيسيا اۆتورلارى 200 مىڭ قول جيناۋدى ماقسات ەتكەن.

بۇعان دەيىن Instagram مەن Twitter جەلىلەرىندە قازاقستان ۇكىمەتىنىڭ رەسمي پاراقشالارى دەلىنگەن فەيك پاراقشالار پايدا بولدى. ونىڭ پايدا بولۋى ءفيلمنىڭ جارناماسىمەن بايلانىستىرىلىپ جاتىر. پاراقشاعا ساشا باروننىڭ ءوزى رەپوست جاساعان.

اتالعان پاراقشاعا "قازاق حالقىنىڭ دوسى دونالد ترامپتى دەباتتاعى جەڭىسىمەن قۇتتىقتايمىز" دەلىنگەن ءبىر عانا ماتەريال سالىنعان. ۆيدەوماتەريال ترامپتىڭ ءار كەزدە سويلەگەن ساتتەرىنەن تۇرادى.

"بورات" ءفيلمىنىڭ العاشقى ءبولىمى 2006 جىلى شىعىپ، قازاقستاندا ۇلكەن شۋ تۋدىرعاننان كەيىن ەل اۋماعىندا كورسەتۋگە تىيىم سالىنعان.

فيلم جەلىسى بويىنشا رەجيسسەر ءارى باس كەيىپكەردى سومداعان ساشا بارون قازاقستاندىق جۋرناليست بوراتتىڭ ءومىرىن كورسەتەدى.