مەملەكەت باسشىسى قاسىم-جومارت توقايەۆ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات ءمۋسيندى قابىلدادى، دەپ حابارلادى اقوردا سايتى.

مۋسين پرەزيدەنتكە ينتەرنەت بايلانىسىنىڭ، اسىرەسە، اۋىلدىق جەرلەردەگى ساپاسى مەن قولجەتىمدىلىگىن ارتتىرۋ، "سيفرلىق قازاقستان" مەملەكەتتىك باعدارلاماسىن ترانسفورماسيالاۋ، سونداي-اق، مەملەكەتتىك قىزمەتتى ونلاين فورماتقا كوشىرۋ جۇمىستارى تۋرالى مينيسترلىكتىڭ ەسەبىن بەردى.

سونداي-اق ول مەملەكەت باسشىسىنا يننوۆاسيالىق ەكوجۇيەنى قالىپتاستىرۋ جولدارى، اەروعارىش سالاسىن دامىتۋ، سونىمەن قاتار، ەكسپورتقا شىعارىلاتىن باسەكەگە قابىلەتتى ءونىم ازىرلەۋ ءۇشىن IT سالاسى بويىنشا كاسىبي ماماندار دايارلاۋ جوسپارى جونىندە باياندادى.

توقايەۆ ءبىلىم بەرۋ پلاتفورماسىن دامىتۋدىڭ، قاشىقتان ءبىلىم بەرۋ ۇدەرىسىنە تەحنيكالىق تۇرعىدان كومەك كورسەتۋدىڭ، مەملەكەتتىك قارجىلاي قولداۋ شارالارىن ەلەكتروندى وقۋلىقتار مەن سيفرلىق ءبىلىم بەرۋ رەسۋرستارىن دامىتۋعا باعىتتاۋدىڭ ماڭىزدىلىعىن اتاپ ءوتتى.

پرەزيدەنت باعدات مۋسينگە مەملەكەتتىك قىزمەتتى پايدالانۋ كەزىندە بيومەتريا تەتىكتەرىن ەنگىزۋ، سيفرلاندىرۋدى باسقارۋ جۇيەسىنە رەفورما جۇرگىزۋ، "زەردە" حولدينگىنىڭ ءرولى مەن جاۋاپكەرشىلىگىن ارتتىرۋ  جونىندە ءبىرقاتار مىندەت جۇكتەدى. مەملەكەت باسشىسى راديوتولقىنداردى ءبولۋدىڭ اشىق تەتىكتەرىن ەنگىزۋدى تاپسىردى.