قىرعىزستان استاناسى بىشكەك قالاسىندا تۇندە ميتينگشىلەر توبى تۇرمەدە وتىرعان بىرنەشە ساياساتكەردى بوساتتى، دەپ حابارلادى Sputnik Kyrgyzstan.
تومەندە بوساپ شىققانداردىڭ ءتىزىمى مەن قىلمىستىق ىستەرى كورسەتىلگەن.
1. المازبەك اتامبايەۆ
قىرعىزستاننىڭ "اق ءۇيىن" باسىپ العاننان كەيىن، نارازىلىق بىلدىرۋشىلەردىڭ ءبىر بولىگى بۇرىنعى پرەزيدەنت المازبەك اتامبايەۆتى بوساتۋ ءۇشىن ۇلتتىق قاۋىپسىزدىك مەملەكەتتىك كوميتەتىنىڭ عيماراتىنا بەت الدى.
ەكس-پرەزيدەنت ۇقك تەرگەۋ يزولياتورىندا بولعان ەدى. ول قىلمىس الەمىنىڭ سەركەسى ازيز باتۋكايەۆتى بوساتاندىققا شىعارۋ ءىسى بويىنشا 11 جىل ەكى ايعا باس بوستاندىعىنان ايىرىلعان. سونداي-اق اتامبايەۆ پەن ونىڭ جاقتاستارىنا كوي-تاشتاعى وقيعالار تۋرالى ءىس قوزعاعان. قىلمىستىق ىستەردىڭ ەگجەي-تەگجەيلەرى بەلگىسىز، ويتكەنى سوت پروسەستەرى جابىق رەجيمدە وتكەن.
وتكەن جىلدىڭ جازىندا اتامبايەۆتى قىلمىستىق جاۋاپكەرشىلىككە تارتۋ ءۇشىن ەكس-پرەزيدەنت مارتەبەسىنەن جانە قول سۇعىلماۋشىلىعىنان ايىرعان بولاتىن. بۇرىنعى مەملەكەت باسشىسى وزىنە جاسالعان ارەكەتتەردىڭ زاڭسىز ەكەنىن مالىمدەگەن. ساياساتكەر ءبىر ءىس بويىنشا تەرگەۋگە بارماعاندىقتان، ونىڭ قوي-تاشتاعى ۇيىنە شابۋىل جاسالعان ەدى.
2. سادىر جاپاروۆ
2017 جىلى اۋداندىق سوت جوگاركۋ كەنەشتىڭ بۇرىنعى دەپۋتاتى تۇتقىندى كەپىلگە العانى ءۇشىن سادىر جاپاروۆتى 11 جىل 6 ايعا باس بوستاندىعىنان ايىرعان. سوت 2013 جىلى جاپاروۆ ۇيىمداستىرعان قاراكولدەگى ميتينگ قاتىسۋشىلارى ىستىقكول وبلىسىنداعى سول كەزدەگى ۇكىمەتتىڭ وكىلەتتى وكىلى ەميلبەك كاپتاگايەۆتى كولىككە كۇشتەپ مىنگىزگەنى مالىمدەلگەن.
كەشە جاپاروۆ جاقتاستارى ساياساتكەردى تۇزەۋ كولونياسىنان بوساتۋدى تالاپ ەتتى. ءبىر ساتتە ۇيىمداستىرۋشىلار جينالعان توپتى باسقارا الماي قالعان. "اق ۇيگە" قاراي بەت العان ادامداردى پوليسيا قۋماقشى بولعان. ناتيجەسىندە بىرنەشە ادام زارداپ شەگىپ، جۇزگە جۋىق ادام ۇستالدى.
3. ساپار يساقوۆ
ساپار يساقوۆ 2017-2018 جىلدارى ۇكىمەت باسشىسى قىزمەتىن اتقاردى. ول بىشكەك جەو-نى جاڭعىرتۋ كەزىندە سىبايلاس جەمقورلىق تۋرالى ءىس بويىنشا 15 جىلعا باس بوستاندىعىنان ايىرىلعان ەدى. سونداي-اق ساياساتكەردى چولپون-اتاداعى مەملەكەتتىك تاريحي مۇراجاي مەن يپپودرومدى قايتا قۇرۋ كەزىندە سىبايلاس جەمقورلىق ءىسى بويىنشا 18 جىلعا باس بوستاندىعىنان ايىردى. قىركۇيەك ايىندا ول مولدوۆانكاداعى تۇزەۋ كولونياسىنا اۋىستىرىلعان.
4. راۆشان جەەنبەكوۆ
كوي-تاشتاعى وقيعالار كەزىندە جوگاركۋ كەنەشتىڭ ەكس-دەپۋتاتى راۆشان جەەنبەكوۆ بۇرىنعى پرەزيدەنت المازبەك اتامبايەۆتىڭ جاعىندا ءسوز سويلەدى. 2019 جىلدىڭ جەلتوقسانىندا ول ىىم-دەن جاۋاپ العاننان كەيىن ۇستالدى. جەەنبەكوۆكە قىلمىستىق كودەكسىنىڭ 244 "تۇتقىندى كەپىلگە الۋ" جانە 264 "جاپپاي تارتىپسىزدىكتەردى ۇيىمداستىرۋ" باپتارى بويىنشا ايىپ تاعىلدى.
5. جانتورە ساتىبالدييەۆ
نارازى توپ بۇرىنعى پرەمەر-مينيستر ءجانتورو ساتىبالدييەۆتى № 47 تۇزەۋ مەكەمەسىنەن شىعارىپ الدى. ول 2012 جىلدان 2014 جىلعا دەيىن مينيسترلەر كابينەتىن باسقارعان.
پرەمەر بولعاننان كەيىن ءجانتورو ساتىبالدييەۆ مەملەكەتتىك لاۋازىمداردى اتقارمادى، ال 2018 جىلى بىشكەكتەگى جەو-نى جاڭعىرتۋ كەزىندە سىبايلاس جەمقورلىق تۋرالى ىسكە فيگۋرانت بولعان. ونىڭ دۇنيە مۇلكى تاركىلەنىپ، 7،5 جىلعا باس بوستاندىعىنان ايىرىلدى.
ەستەرىڭىزگە سالا كەتەيىك، الا-توو الاڭىندا كەشە وپپوزيسيالىق كۇشتەردىڭ نارازىلىق اكسياسى ءوتتى. پارلامەنت سايلاۋىنىڭ الدىن الا قورىتىندىسىنا نارازىلىق بىلدىرگەن 3-4 مىڭ ادام الاڭعا جينالدى. "اق ءۇيدىڭ" قاقپاسىنا شابۋىل جاساعاننان كەيىن پوليسيا مەن نارازى توپتىڭ اراسىندا قاقتىعىستار باستالدى. تۇندە ميتينگشىلەر "اق ءۇيدى" باسىپ الدى.
پىكىر قالدىرۋ