الماتى وبلىسى، ەسىك قالاسىنداعى شارۋاشىلىق قالا جانە وبلىس تۇرعىندارىنىڭ 70 پايىزىن بالىقپەن قامتاماسىز ەتىپ وتىر. مۇندا بالىق وسىرۋدەن بولەك، ارنايى يحتيولوگ مامانداردى دايارلايتىن مەكتەپ تە جۇمىس ىستەيدى.  بالىقشىلار مەكتەبىمەن جانە جالپى شارۋاشىلىقتىڭ جۇمىسىمەن Qamshy  ءتىلشىسى تانىسىپ قايتتى.

مەملەكەت باسشىسى قاسىم-جومارت كەمەل ۇلى بالىق شارۋاشىلىعىن دامىتۋعا ەرەكشە نازار اۋدارۋدا. 2019 جىلى ەلىمىزدە 60 مىڭ توننادان استام بالىق وسىرىلگەن. ءبىراق ەكولوگيا مينيسترلىگىنىڭ مالىمەتىنشە، ەلىمىزدىڭ بالىق ءوسىرۋ پوتەنسيالى الدەقايدا جوعارى. سوندىقتان قازاقستاننىڭ بۇل كورسەتكىشتى 600 مىڭ تونناعا دەيىن وسىرۋگە مۇمكىندىگى بار. مىسالى، ەسىك قالاسىنداعى قوجالىقتا جىلىنا وندىرىلەتىن ءبىر عانا بالىقتىڭ سالماعى – 250 توننا. ال بۇل قوجالىقتا فورەلدەن  بولەك، سازان، امۋر، ءدوڭماڭداي، بەكىرە، كلاريۋس سومى سياقتى بالىقتىڭ 6 ءتۇرى وسىرىلەدى.

بالىق شارۋاشىلىعىنداعى وزەكتى ماسەلەنىڭ ءبىرى – ساپالى كادرلاردىڭ تاپشىلىعى.  سوندىقتان، «يسسىك» فورەل شارۋاشىلىعى بۇل پروبلەمانى جويۋ ءۇشىن ارنايى "بالىق مەكتەبىن" اشىپ، 30 ادامدى وقىتىپ، سونىڭ ىشىندەگى 10 ادامدى جۇمىسپەن قامتاماسىز ەتكەن.

شارۋاشىلىقتىڭ اتقارۋشى ديرەكتورى مارلەن ءتۇرسىنالىنىڭ ايتۋىنشا، مەكتەپتە ءبىلىم الۋشىلارعا بالىقتى قالاي تاماقتاندىرۋ كەرەك، بالىقتى اۋرۋدان ساقتاۋعا باعىتتالعان ۆاكسيناسيانىڭ جاسالۋ جولى قانداي، ءبارى كورسەتىلەدى. 

– بالىق شارۋاشىلىعىنداعى نەگىزگى پروبلەمانىڭ ءبىرى – كادر تاپشىلىعى. وسى سالاداعى بىلگەنىمىزبەن ءبولىسۋ ءۇشىن بالىق مەكتەبىن اشتىق. ال ءقازىر قازاق ۇلتتىق ۋنيۆەرسيتەتىمەن بىرلەسىپ، وقۋ ورنى بازاسىندا عىلىمي-وندىرىستىك ورتالىق اشىپ، ستۋدەنتتەرگە تەوريالىق ءبىلىم بەرىپ جاتىرمىز. سودان كەيىن بىزدە تاجىريبەدەن وتەدى دە، جۇمىسقا ورنالاسادى. قالاسا ءوزى شارۋاشىلىق اشادى، – دەيدى م.ءتۇرسىنالى.

پراكتيكانت بولىپ كەلىپ، كەيىن جۇمىسقا ورنالاسقان قازاق ۇلتتىق ۋنيۆەرسيتەتىنىڭ 4-كۋرس ستۋدەنتى جانسۇلۋ ۇرگەنىشبايەۆا ءقازىر وسى شارۋاشىلىقتا يحتياپوتولوگ مامان. ول بالىقتىڭ اۋرۋعا شالدىقپاۋىنا جاۋاپ بەرەدى.

• قانشا بالىق بولسا، سونشا اۋرۋ بار. سوندىقتان ءبىز اي سايىن دەزينفەكسيا جاساپ، سۋدى تازالايمىز، – دەيدى جاس مامان.

قازاقستان جىل سايىن جاقىن جانە الىس  شەتەلدىڭ وتىز التى ەلىنە (60 ملن. اقش دوللارىنا) 30 مىڭ توننا بالىق ەسكپورتتايدى.  ەندى مينيسترلىك ەكسپورت كولەمىن 10 ەسەگە ۇلعايتۋعا بالىق شارۋاشىلىعىنىڭ الەۋەتى جەتكىلىكتى ەكەنىن العا تارتىپ وتىر. ەگەر وسى باستاماسى جۇزەگە اساتىن بولسا، قازاقستان 60 ەمەس، 600 ميلليون اقش دوللارىنا ەكسپورت جاساي الادى. وسى ورايدا شارۋالاردى قولداۋ ماقساتىندا ءبىرقاتار زاڭعا وزگەرىس ەنگىزىپ، سۋبسيديا بەرۋ جولدارىن قاراستىرىپ جاتىر.