بارلىق ءوڭىردىڭ، قالالار مەن اۋدانداردىڭ اكىمدەرى – پارتيا فيليالدارىنىڭ ءتوراعالارى پارتياىشىلىك ىرىكتەۋ قورىتىندىسىن تالقىلاپ، قۇرمەت گراموتالارىن تابىستاۋ ءۇشىن پرايمەريز قاتىسۋشىلارىمەن كەزدەستى. بۇل تۋرالى پارتيا ءتوراعاسىنىڭ ءبىرىنشى ورىنباسارى باۋىرجان بايبەك Facebook جەلىسىندەگى پاراقشاسىندا حابارلادى.

سونىمەن قاتار، ول 150-دەن استام بەلگىلى ساياساتتانۋشىلاردى، قوعام قايراتكەرلەرى مەن جۋرناليستەردى توپتاستىرعان «Nur Otan» جاقتاستارىنىڭ ليگاسىمەن كەزدەسۋدە پارتياىشىلىك سايلاۋدى ۇيىمداستىرۋ بارىسىن باقىلاۋعا ايرىقشا اتسالىسىپ، ايقىندىعى مەن ءادىل ءوتۋىن قامتاماسىز ەتكەنى ءۇشىن قوعام بەلسەندىلەرىنە العىس ايتتى.

«باس قوسۋدا پرايمەريزدىڭ ءبىرىنشى كەزەڭىنىڭ قورىتىندىسىن ەگجەي-تەگجەيلى تالقىلادىق. جاقتاستار ليگاسىنىڭ ايتۋىنشا، «Nur Otan» پرايمەريزى – ەلدىڭ قوعامدىق-ساياسي ومىرىندەگى ەلەۋلى وقيعا. ءبىر جارىم ميلليوننان استام ادامدى قامتىعان كانديداتتار ءبىر اي بويى پىكىرسايىستىڭ كورىگىن قىزدىرىپ، يدەيالارى مەن جوبالارىن تانىستىردى، ەل مەن قوعام ءۇشىن ماڭىزى زور ويلارىن اشىق ايتىپ، كاسىبي، ساياسي قابىلەتىن شىڭدادى»، – دەدى ول.

«Nur Otan» پارتياسى ءتوراعاسىنىڭ ءبىرىنشى ورىنباسارى ۇرگىزىلگەن تالداۋلارعا سايكەس، تىركەلگەن 10 073 كانديداتتىڭ ىشىندە پرايمەريزگە بارلىق دەڭگەيدەگى ءماسليحاتتاردىڭ 1410 قىزمەتتەگى دەپۋتاتى قاتىسقانىن اتاپ ءوتتى. ولاردىڭ 213ء-ى پارتياىشىلىك ىرىكتەۋدىڭ ءبىرىنشى كەزەڭىنەن وتە الماعان. ياعني پرايمەريزدەن ءماسليحاتتاردىڭ قىزمەتتەگى دەپۋتاتتارىنىڭ ۇشتەن ءبىرى عانا ءوتتى.

ەڭ جوعارى ناتيجەگە قول جەتكىزگەن 500-دەن اسا قاتىسۋشى – ۆولونتەرلار، كوپ بالالى انالار، قاراپايىم پەداگوگتار، دارىگەرلەر، كاسىپورىن قىزمەتكەرلەرى جانە باسقالار.

بۇل رەتتە، پرايمەريز پارتيا قاتارىنا 42 مىڭنان استام جاڭا مۇشەلەردى تارتۋعا مۇمكىندىك بەردى. ولاردىڭ 1000-نان استامى پارتياىشىلىك سايلاۋعا قاتىسىپ، ءاربىر 4ء-شىسى داۋىس بەرۋ قورىتىندىسى بويىنشا ەڭ جوعارى رەيتينگكە يە بولدى.

«وسىلايشا، پرايمەريزدىڭ ءبىرىنشى كەزەڭىنىڭ قورىتىندىسى بويىنشا «Nur Otan»-نىڭ بارلىق دەڭگەيدەگى ءماسليحاتتارعا ارنالعان پارتيالىق تىزىمدەرى 60%-تەن استام جاڭارادى دەپ ايتۋعا نەگىز بار»، – دەپ جازدى باۋىرجان بايبەك.

ول ءوز جازباسىندا جاقتاستار ليگاسىنىڭ رولىنە ەرەكشە توقتالدى. ونىڭ ايتۋىنشا، جاقتاستار ليگاسىنىڭ قولداۋىمەن ءتۇرلى ءتارتىپ بۇزۋشىلىقتار مەن ايلا-امالداردىڭ دەر كەزىندە جولى كەسىلىپ، اشىقتىق پەن ايقىندىق قامتاماسىز ەتىلگەن. سونداي-اق، جاقتاستار ليگاسىنىڭ 30-دان استام مۇشەسى پرايمەريزگە قاتىسۋ ءۇشىن پارتيا قاتارىنا كىردى. داۋىس بەرۋ قورىتىندىسى بويىنشا 6 ادام ءوز قالاسى مەن اۋدانىندا العاشقى 10-دىققا كىرىپ، كەلەسى كەزەڭگە وتكەن.

«كەزدەسۋ بارىسىندا قىزىقتى دا كرەاتيۆتى ۇسىنىستار تىلگە تيەك ەتىلدى، ونىڭ ىشىندە پارتيا جۇمىسىن ودان ءارى جەتىلدىرۋ، جاقتاستار ليگاسىن ينستيتۋسيونالداندىرۋ مۇمكىندىگى سەكىلدى تىڭ ۇسىنىستار بار. سونىمەن بىرگە حالىقتىڭ وزەكتى ماسەلەلەرىن شەشۋگە بايلانىستى جۇمىلىپ ىستەيتىن جۇمىستاردى جالعاستىرۋ جونىندە دە كەلىسىمگە كەلدىك. جاقتاستار ليگاسىندا اتاپ وتكەندەي، پرايمەريزدە «ۇتىلعاندار جوق، ءبارى دە يگىلىككە جەتتى. ەڭ الدىمەن بۇل ءىس-شارا ەلىمىز ءۇشىن يگىلىكتى بولدى!» – دەپ تۇيىندەدى ول.