تالعار اۋدانىنىڭ اكىمى سەرىكجان ەرەكەشيەۆ وڭىردەگى ءۇش سپورت مەكتەبىنە اۆتوكولىك كىلتىن تابىستاپ، سپورتشى جاستار مەن جاتتىقتىرۋشىلار قۇرامىن قۋانىشقا كەنەلتتى.

سەرىكجان قازي ۇلى سپورت مەكتەپتەرىنىڭ باسشىلارىنا كولىك كىلتتەرىن سالتاناتتى تۇردە تابىس ەتە وتىرىپ، وبلىس باسشىسىنىڭ ىستىق سالەمىن ايتتى. ءسوز سوڭىندا سپورت مەكتەپتەرىنە اۋداندىق اكىمشىلىك تاراپىنان قاجەتتى قولداۋلار كورسەتىلەتىندىگىن تىلگە تيەك ەتتى.

– «المالى» بالالار مەن جاسوسپىرىمدەر سپورت مەكتەبىنىڭ اشىلعانىنا ەكى جىل تولادى. وسى ۋاقىت ارالىعىندا سپورتتىڭ 13 ءتۇرى بويىنشا 954 بالا سپورتپەن شۇعىلدانىپ، ءبىرازى ءتۇرلى دەڭگەيدەگى سپورتتىق جارىستاردا جەڭىمپاز اتانىپ، بيىكتەردەن كورىنۋدە. تالعاردا تالانتتى سپورتشىلار ءوسىپ كەلەدى. وبلىس اكىمى اماندىق باتالوۆتىڭ قولداۋىمەن قولىمىزعا شاعىن اۆتوبۋستىڭ كىلتىن الىپ وتىرمىز. ءبىزدىڭ ۇجىم ءۇشىن زور قۋانىش. سەبەبى، سپورت مەكتەبى اشىلعالى بەرى كولىگىمىز بولماعان. ەندى بالالاردىڭ جارىستارعا قاتىناۋىندا قيىندىقتار تۋىندامايدى، – دەدى اتالعان سپورتتىق مەكەمەنىڭ ديرەكتورى ايگۇل بيتۋوۆا.

– اۆتوكولىك العانىمىزعا وتە قۋانىشتىمىز. بالالاردى جارىستارعا جەتكىزۋىمىزگە، سونداي-اق، سپورت مەكتەبىنىڭ ىشكى قاجەتتىلىگىن وتەۋگە، ۆەلوسيپەدكە كەرەك قوسىمشا قۇرال-جابدىق الۋ ءۇشىن دە قاتىناس كولىگى رەتىندە كوپ كومەگى تيەتىن بولادى. اۋداندا ۆەلوسپورتقا اۋەس 500 بالا وسى سپورتتىڭ جاندانۋىنا اتسالىسىپ كەلەدى. ولاردىڭ اراسىندا رەسپۋبليكا چەمپيوندارى دا بار، – دەدى ءۇش جەڭىل كولىكتىڭ كىلتىن العان اندرەي كيۆيليەۆ اتىنداعى ۆەلوسپورتتان وبلىستىق وليمپيادا ءىزباسارلارىن دايىنداۋعا ارنالعان ارناۋلى بالالار مەن جاسوسپىرىمدەر سپورت مەكتەبىنىڭ ديرەكتورى سەرگەي ترەتياكوۆ. سونىمەن قاتار، 16 ورىندى «گازەل» شاعىن اۆتوبۋسىنىڭ كىلتىن العان قىسقى سپورت تۇرلەرىنەن وبلىستىق مامانداندىرىلعان بالالار مەن جاسوسپىرىمدەر سپورت مەكتەبىنىڭ باسشىسى قايرات نۇربايەۆ تا اۋدان اكىمىنە ريزاشىلىعىن ءبىلدىردى. اۆتوكولىك كىلتتەرىن سالتاناتتى تۇردە تابىستاعان سوڭ اۋدان اكىمى سەرىكجان ەرەكەشيەۆ «المالى» سپورت مەكتەبىنىڭ جۇمىسىمەن تانىستى. سپورتتىڭ 13 تۇرىنەن، سونىڭ ىشىندە، جاعاجاي ۆولەيبول، تاەكۆوندو، كاراتە، قازاقشا كۇرەس، بوكستەن جان ايانباي جاتتىعىپ جاتقان جاسوسپىرىمدەردىڭ قىزۋ دايىندىقتارىنا ريزاشىلىعىن بىلدىرگەن ول كەزدەسۋ بارىسىندا بالالاردىڭ سپورتتان قول ۇزبەۋلەرىنە جانە العا قويعان ماقساتتارىنا جەتۋلەرىنە ىزگى نيەتىن ءبىلدىردى. وسى تۇستا اۋدان اكىمى سەرىكجان قازي ۇلىنىڭ جاس شاعىندا كۇرەسپەن اينالىسقاندىعىن، قازىرگى كەزدە ارا-تۇرا فۋتبول وينايتىندىعىن دا سۇراپ، بىلدىك.

– اۋدانىمىزدا سپورتتىق مەكتەپتەردىڭ بازاسى جىلدان-جىلعا تولىعىپ، جاڭارتىلۋدا. سپورتسۇيەر جاستارىمىزدىڭ جاتتىعۋىنا، جارىستارعا قاتىسۋىنا بارلىق جاعداي قاراستىرىلعان. اۆتوكولىكتىڭ الىنۋى دا سونىڭ دالەلى. بيىلعى جىلعا جوسپار بويىنشا 48090.0 مىڭ تەڭگە قاراجات ءبولىندى. سونىڭ 20500 مىڭ تەڭگەسىنە «المالى» بجسم-نە «Hyindai H350» 17 ورىندى شاعىن اۆتوبۋسى، قىسقى سپورت تۇرلەرىنەن وبلىستىق مامانداندىرىلعان بالالار مەن جاسوسپىرىمەدەر مەكتەبىنە 11500 مىڭ تەڭگەگە 16 ورىندى «گازەل» شاعىن اۆتوبۋسى، ال ا.كيۆيليەۆ اتىنداعى ۆەلوسپورت مەكتەبىنە قۇنى 6250 مىڭ تەڭگەلىك «Lada Vesta» جانە 7 ورىندى 2 «Lada Largus» اۆتوكولىكتەرى 9840.0 مىڭ تەڭگەگە بەرىلدى، – دەيدى تالعار اۋداندىق دەنەشىنىقتىرۋ جانە سپورت ءبولىمىنىڭ باسشىسى امانجول نۇرمانوۆ.

وسىلايشا جاڭا اۆتوكولىكتىڭ كىلتتەرىن العان سپورت مەكتەپتەرىنىڭ باسشىلارى مەن جاتتىقتىرۋشىلار، جاسوسپىرىمدەر قۋانىشتارىن جاسىرا الماي، جەڭىس تۋىن جەلبىرەتۋگە ۋادە بەردى.