مەملەكەت باسشىسى قاسىم-جومارت توقايەۆتىڭ باستاماسىمەن 2020 جىل ۆولونتەرلەر جىلى دەپ بەكىتىلگەن بولاتىن. قازىرگى تاڭدا قازاقستاننىڭ ءار ايماعىندا ەرىكتىلەر كومەگىمەن اتقارىلىپ جاتقان جۇمىس جەتەرلىك. ەرىكتىلەر جىلىندا تالدىقورعان قالاسىندا قانداي شارالار قولعا الىنىپ، اتقارىلىپ جاتقانىن ءبىلۋ ماقساتىندا "Nur Otan" پارتياسى الماتى وبلىستىق فيليالى جانىنداعى "جاس وتان" جاستار قاناتى كوممۋنيكاسيا ءبولىمىنىڭ باسشىسى جۇلدىز بەكمۇراتقىزىمەن سۇحباتتاسىپ كورگەن ەدىك.

– جۇلدىز، ءسىزدىڭ ۆولونتەرلەر قاتارىنا قوسىلعانىڭىزعا قانشا ۋاقىت بولدى؟

– مەن 2016 جىلى تالدىقورعان قالاسىنىڭ پوليتەحنيكالىق كوللەدجىنە وقۋعا ءتۇستىم. سول كەزدەن باستام بەلسەندى بولىپ، قوعامدىق جۇمىستارعا ارالاسىپ ءجۇردىم. ودان كەيىن ۆولونتەرلىك ءىس جايلى ەستىپ ءبىلدىم. ەش ويلانباستان ەرىكتى بولۋدى شەشتىم. مەن ەرىكتى بولىپ "جاستارعا قىزمەت كورسەتۋ" ورتالىعىندا ،"جاس وتاندا"، پوليتەحنيكالىق كوللەدجدىڭ ەرىكتىلەر توبىندا جۇمىس اتقاردىم.

– ۆولونتەرلىك ىسپەن قاي جاستان باستاپ اينالىسۋعا رۇقسات ەتىلەدى؟ قانداي دا ءبىر شەكتەۋلەر جوق پا؟

– ۆولونتەرلىك ىسپەن مەكتەپ جاسىنان باستاپ اينالىسا بەرۋگە بولادى. ياعني، 14 جاستان اسقان بالالار ەرىكتىلەر قاتارىنا قوسىلا الادى.

–جاسىراتىنى جوق، شەت ەلدەردە ۆولونتەرلىك ءىس جاقسى دامىعان، ءبىزدىڭ ەلدە ەرىكتىلەر قاتارىن كوبەيتۋ ءۇشىن نە ىستەۋ كەرەك؟

– جالپى، وسى جىلى ەرىكتىلەر سانى ەرەكشە قارقىنمەن كوبەيدى. سەبەبى، وتكەن جىل "جاستار جىلى" بولسا، وسى جىل "ۆولونتەرلار جىلى" دەپ اتالدى. وسىعان بايلانىستى ەرىكتىلەر جۇمىسىنىڭ جاقسى جۇرۋىنە كوپ قولداۋ كورسەتىلىپ جاتىر. وكىنىشكە قاراي، قازىرگى تاڭدا ەرىكتىلەردىڭ كىم ەكەنىن بىلمەيتىندەر دە بار. ەرىكتىلەر سانىن ارتتىرۋ ءۇشىن كوپتەگەن اكسيالار، ءىس-شارالار ۇيىمداستىرۋ كەرەك. جاستاردى بۇل ىسپەن جاقىنىراق تانىستىرۋ كەرەك.

– جىل باسىنان بەرى تالدىقورعان قالاسىندا قانداي ءىس-شارالار جۇرگىزىلدى؟

–  ءقازىر رەسپۋبليكامىزدىڭ بارلىق وڭىرىندە جۇزەگە اسىپ جاتقان شارا بار. ول - "دارىگەرلەرگە مىڭ العىس" اكسياسى. ءبىزدىڭ ەرىكتىلەر توبى اۋرۋحانالارعا بارىپ، دارىگەرلەرگە كومەك كورسەتتى. ولارعا قىمىز، شۇبات اپارىپ، العىسىمىزدى ايتتىق. جانە دە "قارتتارىم، اسىل قازىنام" اكسياسى جۇرۋدە. جالعىزباستى قارت كىسىلەرگە، مۇگەدەك جاندارعا ۇنەمى كومەكتەسىپ وتىرامىز. دارى-دارمەك، ازىق-تۇلىك جەتكىزىپ بەرەمىز. بۇدان بولەك، "جىلى مەيىرىم"، "مەكتەپكە جول" سىندى اكسيالار وتكىزدىك.

– ەلباسىنىڭ رەسمي سايتىنداعى دەرەكتەردە ايتىلعانداي، الەمدە 970 ميلليون ادام ۆولونتەر بولسا، ونىڭ ىشىندە، ءاربىر سەگىزىنشى قازاقستاندىق ەرىكتى قاتارىنا قوسىلادى ەكەن. ءبىزدىڭ قالامىزداعى بەلسەندىلىك قانداي؟

– ءقازىر قالامىزدىڭ تۇكپىر-تۇكپىرىندە ۆولونتەرلەر توبى قۇرىلىپ جاتىر. ءبىز سول توپتاردىڭ اشىلۋىنا بارىپ ءجۇرمىز. ءوزىمىز ولاردىڭ قانداي جۇمىس اتقارىپ جاتقانىن، بىر-بىرىنە دەگەن قارىم-قاتىناستارىن كورىپ، كومەك كورسەتىپ جاتىرمىز. ءبىزدىڭ قالامىزدا جاقىندا "ۆولونتەرلەر ليگاسى" اشىلعان بولاتىن. سول جەرگە بارىپ قايتتىق. مىنە، وسىنىڭ ءوزى ۇلكەن جەتىستىك. الداعى ۋاقىتتا دا مۇنداي توپتار كوبەيەدى دەگەن ۇمىتتەمىز.

– قازىرگى تاڭدا ۆولونتەرلىك ىسپەن جاستار قارقىندى اينالىسىپ ءجۇر. ال ەرىكتىلەر قاتارىنا ۇلكەن بۋىننىڭ قوسىلۋى قالاي؟

– نەگىزى "جاقسىلىق جاس تالعامايدى" دەيدى عوي. بىزگە باعىت-باعدار كورسەتۋ ءۇشىن اقىل-كەڭەسىمەن ءبولىسۋ ءۇشىن ۇلكەن كىسىلەر كەلىپ كومەكتەسەدى. اعا-اپكەلەرىمىز "قالاي ەرىكتى بولا الامىز؟" دەگەن ساۋالدارمەن كەلەدى. كارانتين كەزىندە ءبىز "جاس وتان" جاستار قاناتىنىڭ پارقشاسىندا ونلاين ۆولونتەر اكسياسىن وتكىزدىك. سول كەزدە ونلاين ۆولونتەرلەر قاتارىندا ۇلكەن بۋىن كوپ بولدى. ارينە، ولاردىڭ بەلسەندىلىگى ءبىزدى قۋانتتى.

– ءسىزدىڭ ويىڭىزشا ۆولونتەر بولۋ جاس بۋىنعا نە بەرەدى؟

– ەرىكتى بولۋ ءار ادامعا ءار ءتۇرلى سەزىم سىيلايدى. ۆولونتەر بولعان كەزىڭدە قوعامعا جاقىندايسىڭ. كومەككە مۇقتاج جانداردى كورەسىڭ. بىرنەشە رەت كومەك كورسەتكەننەن كەيىن بۇل ىسپەن قايتا اينالىسقىڭ كەلىپ تۇرادى. ەرىكتى ادام اينالاسىنداعىلارعا ۇنەمى كومەكتەسىپ، قولداپ جۇرەدى. ءار ادامدى ءوز جاقىنىنداي كورەدى. ادام بويىنا مەيىرىمدىلىك، جانارشىلىق سەزىمىن ۇيالاتادى.

– ۆولونتەرلەر ۇنەمى ادامدارعا كومەك كورسەتىپ جۇرەدى. ال مەملەكەت تاراپىنان ۆولونتەرلەرگە قانداي قولداۋ كورسەتىلىپ جاتىر؟ –

–كوپتەگەن ۆولونتەرلاردىڭ قايىرىمدىلىققا قاتىستى يدەيالارى بار جانە ولار ونى جۇزەگە اسىرعىسى كەلەدى. وسى تۇستا مەملەكەتىمىز ەرىكتى ادامعا 300 مىڭ تەڭگە ۇسىنادى. ۆولونتەر ءوزىنىڭ جوباسىن ۇيىمداستىرىپ، ونى تانىستىرادى. جوبا جەڭىسكە جەتسە، مەملەكەتتەن بولىنگەن قارجىنى الىپ، ونى يگەرەدى. مىنە، وسىلاي كەز-كەلگەن ۆولونتەر ءوز ارمانىن ىسكە اسىرا الادى.

– حالقىمىز "جۇمىلا كوتەرگەن جۇك جەڭىل" دەيدى عوي. قيىن-قىستاۋ كەزەڭ، كارانتين ۋاقىتىندا حالىققا قانداي كومەك كورسەتىلدى؟

–  وسى كارانتين كەزىندە ەرىكتىلەردىڭ جۇمىسى ايقىن كورىندى. اۋرۋاحانالاردا دارىگەرلەر جەتىسپەگەن كەزدەردە ءبىزدىڭ ۆولونتەرلار بارىپ، قول ۇشىن سوزعان بولاتىن. جانە دە كوپ ادامدار ءدارىحانا الدىندا كەزەكتە تۇرىپ قالماسىن دەپ، بارلىق ءدارىحانالاردى ارالاپ، دارىلەردىڭ ءتىزىمىن جاساپ ۇلەستىرىپ وتىردى. ۇيدەن شىعا المايتىن ادامدارعا دارى-دارمەك، ازىق-تۇلىك اپارىپ بەرەتىن اۆتوۆولونتەرلەر جۇمىس جاسادى. بارلىق قاجەتتى زاتتاردى جەتكىزدى.

– ءسىزدىڭ ويىڭىزشا "ەرىكتىلەر جىلى" اياقتالعاننان كەيىن قايىرىمدىلىق جۇمىستارى قوعامنان جوعالىپ كەتۋى مۇمكىن بە؟

– وسى جىل بىزگە ەرىكتىلەردى جاڭا قىرىنان كورسەتكەندەي بولدى. ولاردىڭ اتقاراتىن جۇمىستارىنىڭ قوعام ءۇشىن ماڭىزدى ەكەنىن بايقادىق. الداعى جىلداردا بۇل ءۇردىس توقتاپ قالادى دەپ ويلامايمىن. سەبەبى، وسى جىل كوپ ادامنىڭ كوزىن اشىپ، كوكىرەگىن وياتتى. اينالامىزدا كومەككە مۇقتاج جانداردىڭ بار ەكەنىن، ولارعا كومەك قولىن سوزا الاتىنىن كوپ ادام ءتۇسىندى. كىشكەنتاي بولسىن مەيىرىمدىلىك تانىتىپ، ونى باسقالارمەن ءبولىسۋدىڭ ماڭىزى زور ەكەنىن بايقادىق. بۇل جىل تەك باستاماسى دەپ بىلەمىن. الدا ءالى تالاي بەلەستەر بار. ۆولونتەرلەر قاتارى تولىعىپ، قايىرىمدىلىق ىستەر جالعاساتىنىنا سەنەمىن.

– اڭگىمەڭىزگە راحمەت!

سۇحباتتاسقان - ەركەجان سەيداحمەت