قازاقستان ۇكىمەتى زەينەت جاسىن تومەندەتۋ ماسەلەسىن قاراستىرىپ جاتقان جوق. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ونلاين بريفينگتە مالىمدەدى. 

– زەينەت جاسىن تومەندەتۋ جونىندە ۇسىنىستار كەلىپ جاتىر. جالپى، زەينەت جاسىن ۇلعايتۋ مەن تومەندەتۋ ماسەلەسى ءبىر مەزەتتە شەشىلەتىن دۇنيە ەمەس. كەز كەلگەن ەلدە، الەمدە بۇل ماسەلەگە قاتىستى شەشىم قابىلدانعاندا – ۇلكەن زەرتتەۋلەر، ۇزاق مەرزىمدى بولجامدار جاسالادى. بۇل جەردە ەكونوميكالىق، دەموگرافيالىق فاكتورلار ەسكەرىلەدى. جۇمىس ىستەپ جۇرگەن ازاماتتار مەن زەينەتكەرلەردىڭ سانىنىڭ اراسىنداعى ارا قاتىناس مولشەرى، حالىقتىڭ جالپى قارتايۋ قارقىنى، سونداي-اق باسقا دا كورسەتكىشتەر ەسكەرىلەدى، – دەدى مينيستر.

ول ەلدە زەينەتاقىنىڭ ءۇش جۇيەسى قالىپتاسقانىن ايتتى.

– مەملەكەت تاراپىنان ەكى ءتۇرى تولەنەدى: جاسىنا بايلانىستى زەينەتاقى مەن بازالالىق زەينەتاقى بار. سونداي-اق جيناقتاۋشى زەينەتاقى قورىنان جينالعان قارجى ەسەبىنەن زەينەتاقىسى بار.

كەز كەلگەن زەينەتاقىنىڭ ءتۇرى ەڭبەك وتىلىنە تىكەلەي بايلانىستى. ياعني نەعۇرلىم ەڭبەك ءوتىلى جوعارى بولسا، سوعۇرلىم زەينەتاقىنىڭ مولشەرى دە جوعارى. بۇل تۇرعىدا ەكونوميكالىق تا، ەڭبەك نارىعىنىڭ ماسەلەسىن ەسكەرۋ قاجەت. مىسالى، جۇمىس ىستەپ جۇرگەن ازاماتتار مەن زەينەتكەرلەردىڭ اراسىنداعى اراقاتىناس مولشەرى قارالادى. وسىدان 10 جىل بۇرىن زەينەتكەرلەرىمىزدىڭ سانى جۇمىس ىستەپ جۇرگەندەرگە قاتىستى 20 پايىز بولسا، ياعني 5 ادام 1 زەينەتكەرگە سايكەس كەلەتىن. ءقازىر 30 پايىزدان اسىپ جاتىر. ەكىنشىدەن، حالىقتىڭ قارتايۋ ديناميكاسى دەيمىز، بىزدە 65 جاستان اسقان اعا بۋىن سانى كوبەيىپ جاتىر. بەس جىل بۇرىن 6،8 پايىز بولسا، بۇگىندە 7 پايىزعا جەتتى.

الەمدەگى ترەندتەردى ەسكەرە وتىرىپ، بۇكىل دۇنيە جۇزىندەگى ەلدەر قايتا زەينەت جاسىن ۇلعايتۋدى ويلانىپ جاتىر. ارينە، ەۋروپادا جانە باسقا دا دامىعان ەلدەردە زەينەت جاسى بىزدىكىنەن بۇرىن دا جوعارى ەدى. ال كورشىلەس ەلىمىزدى قاراساق، مىسالى رەسەيدە 2019 جىلدان باستاپ ەرلەر مەن ايەلدەرگە زەينەت جاسىن 5 جاسقا ۇلكەيتۋ شارالارى قولدانىلا باستادى. ازەربايجان دا 2017 جىلدان باستاپ وسى شارانى قولدانىپ جاتىر، – دەدى نۇرىمبەتوۆ ونلاين بريفينگتە.

مينيستر ۇكىمەتتىڭ تاراپىنان زەينەت جاسىن تومەندەتۋ ماسەلەسى قاراستىرىلىپ جاتقان جوعىن اتاپ ايتتى.

– الەمدىك تاجىريبەنى دە ەسكەرىپ، ءوزىمىزدىڭ ەكونوميكالىق، دەموگرافيالىق جاعدايعا سۇيەنە وتىرىپ، بۇگىنگى تاڭدا ۇكىمەتتىڭ تاراپىنان زەينەت جاسىن تومەندەتۋ ماسەلەسى قاراستىرىلىپ جاتقان جوق – دەدى ب.نۇرىمبەتوۆ