"Nur Otan" پارتياسىنىڭ ءتوراعاسى نۇرسۇلتان نازاربايەۆ ورىنباسارى باۋىرجان بايبەكتى قابىلداپ، پرايمەريز قورىتىندىسىن تالقىلادى، دەپ حابارلادى elbasy.kz سايتى.

"پارتيا ءتوراعاسىنىڭ ءبىرىنشى ورىنباسارىنىڭ اقپاراتىنا سايكەس، پارتيالىقتاردىڭ 84،2 پايىزى داۋىس بەرۋگە قاتىستى. ونىڭ 88 پايىزى ونلاين فورماتتا قاتىسقان. تىركەلگەن 10 073 ۇمىتكەردىڭ 36 پايىزى ايەل، 29 پايىزى 35 جاسقا دەيىنگى جاستار. پارتياىشىلىك ىرىكتەۋ قورىتىندىسى بويىنشا 20 مىڭنان استام ۇسىنىس، ونىڭ ىشىندە تۇرعىن ءۇي قاتىناستارى جانە تكش، ينفراقۇرىلىم جانە كولىك، ءبىلىم بەرۋ جانە دەنساۋلىق ساقتاۋ سالالارى بويىنشا جينالدى" دەلىنگەن حابارلامادا.

سايت مالىمەتىنشە، نۇرسۇلتان نازاربايەۆ پرايمەريز ناقتى الەۋمەتتىك ليفتكە اينالعانىن، بۇل پارتيالىق قاتارلاردى جاڭارتۋعا، سونىمەن قاتار قاجەتتى ساباقتاستىقتى ساقتاۋعا مۇمكىندىك بەرگەنىن اتاپ ءوتتى.

– بۇل پارتيانىڭ اۋقىمدى ءىس-شاراسى بولدى، وعان كوپتەگەن ادامدار قاتىستى. ءبىز ونى العاش رەت وتكىزدىك. پارتيانىڭ نازارىن تالاپ ەتەتىن كوپتەگەن تىلەكتەر مەن سۇراقتار ايتىلدى. "Nur Otan" – ناقتى ىستەر پارتياسى. ءبىز قابىلداعاننىڭ ءبارى مىندەتتى تۇردە ورىندالۋى ءتيىس، – دەدى نازاربايەۆ..

سونىمەن قاتار، تۇڭعىش پرەزيدەنت پارتيانىڭ سايلاۋالدى باعدارلاماسىنىڭ جوباسىنا جەكە توقتالدى.

– ساياسي كەڭەس بيۋروسىندا ءبىز رەسپۋبليكالىق سايلاۋالدى باعدارلامانىڭ جوباسىن تالقىلادىق. باعدارلامادا كۇردەلى جاعدايدى ەسكەرە وتىرىپ، ءبىزدىڭ ماقساتتارىمىز بەن اۋقىمدى مىندەتتەرىمىز قويىلعان. پارتيانىڭ بارلىق مۇشەلەرى وسىعان باعدارلانادى. سايىپ كەلگەندە، مۇنىڭ ءبارى حالىقتىڭ ءال-اۋقاتىنا باعىتتالعان. ءبىزدىڭ بارلىق سايلاۋالدى ۋادەلەرىمىز ەسەپتەلۋى ءتيىس، – دەدى پارتيا ءتوراعاسى.

كەزدەسۋ بارىسىندا ەلباسى پارتياعا "Birgemiz" قورىمەن بىرلەسىپ، بۇكىل ەل بويىنشا تاعى 100 مىڭ الەۋمەتتىك وسال توپقا جاتاتىن وتباسىعا 50 مىڭ تەڭگەدەن قوسىمشا اتاۋلى تولەم ۇيىمداستىرۋدى پىسىقتاۋدى تاپسىردى.

– پارتيانىڭ ورتالىق اپپاراتى مەن اكتيۆىمىز ۇلكەن جۇمىس اتقاردى. مەن ولاردىڭ قاجىرلى ەڭبەگى ءۇشىن بارىنە ريزامىن. الدا ءالى ناقتى ىستەر كوپ. ەل يگىلىگى ءۇشىن جۇمىستى جالعاستىرۋ ماڭىزدى، – دەپ اياقتادى ءسوزىن ەلباسى.