قازاقستاندا قىركۇيەكتىڭ ەكىنشى جەكسەنبىسى وتباسى كۇنى بولىپ بەلگىلەنگەن. وسىعان وراي الماتىدا «الماتى – باقىتتى وتباسىلار مەكەنى» اكسياسى وتەدى.
«تۇرمىستىق زورلىق-زومبىلىق قۇرباندارىنا ارنالعان داعدارىس ورتالىعى» كمم قازاقستانداعى وتباسى كۇنىنە بايلانىستى 7– 11 قىركۇيەك ارالىعىندا ءتۇرلى شارالاردى قامتيتىن اپتالىق وتكىزەدى. اپتالىق اياسىندا ويىن-ساۋىق، تاربيەلىك جانە قايىرىمدىلىق شارالار مەن «الماتى – باقىتتى وتباسىلار مەكەنى» اكسياسى بار»،– دەپ حابارلادى داعدارىس ورتالىعىنان.
ءار ادام ومىرىندەگى ەڭ قاراپايىم ءارى ەڭ ماڭىزدى نارسەلەر: جانۇياسى، بالا-شاعاسى، ءۇيى جانە جاقىن ادامدارى. بارلىق ۋاقىتتا وتباسى كۇشتى مەملەكەتتىڭ نەگىزى، ءارتۇرلى كەزەڭ ۇرپاقتارىن بىرىكتىرەتىن حالىقتىڭ رۋحاني جانە مادەني داستۇرلەرىن ساقتاۋشى بولدى جانە سولاي بولىپ قالا بەرمەك. وتباسى كۇنىن اتاپ ءوتۋ ارقىلى ءبىز ەجەلدەن جالعاسىن تاۋىپ جاتقان وتباسىنا سۇيىسپەنشىلىكپەن قاراپ، قامقورلىق تانىتۋ داستۇرلەرىن جاڭعىرتىپ، ولارعا جاڭا لەپ بەرەمىز.
«الماتى – باقىتتى وتباسىلار مەكەنى» اكسياسىنا الماتى قالاسى اۋەزوۆ، المالى، بوستاندىق جانە تۇركسىب اۋدانداندارىنداعى پوليسيا باسقارماسىنىڭ ايەلدەردى زورلىق-زومبىلىقتان قورعاۋ جونىندەگى ينسپەكتورلارى جانە داعدارىس ورتالىعىنىڭ قىزمەتكەرلەرى قاتىسۋدا. اتالمىش اكسيانىڭ العاشقى كەزەڭىندە قولونەر بويىنشا شەبەرلىك سىنىپتار وتكەن. وندا داعدارىس ورتالىعىندا قونىستانعان بالالار مەن ينسپەكتورلار بىرلەسە وتىرىپ تاستار، اتلاس جولاقتارى جانە فواميراننان ادەمى سۋرەتتەر مەن ءتۇرلى اشەكەي بۇيىمدار جاسادى. قورىتىندى رەتىندە اكسياعا قاتىسۋشىلاردىڭ ءبىر توبى قولداۋدى قاجەت ەتەتىن وتباسىلارعا بارىپ، شەبەرلىك سىنىپتارىندا جاسالعان سىيلىقتار مەن مەكتەپ وقۋشىلارىنا ارنالعان كەڭسە تاۋارلارىن بەرۋ جوسپارلاپ وتىر»، – دەلىنگەن حابارلامادا.
پىكىر قالدىرۋ