مەملەكەت باسشىسى قاسىم-جومارت توقايەۆ پرەمەر-مينيستر اسقار ءماميندى قابىلدادى، دەپ حابارلادى اقوردا سايتى.

ۇكىمەت باسشىسى پرەزيدەنتكە ەلدىڭ 9 اي ىشىندەگى الەۋمەتتىك-ەكونوميكالىق دامۋ قورىتىندىلارى جونىندە ەسەپ بەردى.

سونىمەن قاتار مامين قاسىم-جومارت توقايەۆقا ءبىرقاتار سالادا دامۋدىڭ وڭ قارقىنى بايقالاتىنى تۋرالى باياندادى. اتاپ ايتقاندا وڭدەۋ ونەركاسىبىنىڭ ءوسىمى 3،3%-عا جەتكەن، قۇرىلىس كولەمى 10،5 %-عا، تۇرعىن ۇيلەردىڭ پايدالانۋعا بەرىلۋى 9%-عا نەمەسە شامامەن 9،6 ميلليون شارشى مەترگە ارتقان. اۋىل شارۋاشىلىعىنداعى ءوسىم كورسەتكىشى 5%-دى قۇرادى. قازاقستاننىڭ التىن-ۆاليۋتا قورى مەن ۇلتتىق قور اكتيۆتەرى 1 قازانداعى مالىمەت بويىنشا 91،1 ميلليارد دوللارعا جەتتى.

ۇكىمەت باسشىسىنىڭ ايتۋىنشا، قىركۇيەكتە قىزمەت كورسەتۋ سالاسىنداعى بەلسەندىلىكتى قايتا قالپىنا كەلتىرۋ جۇمىستارى باستالدى. وسى رەتتە تامىز ايىمەن سالىستىرعاندا ساۋدا-ساتتىق 2،7%-عا، بايلانىس 1،3%-عا، كولىك جانە قويما قىزمەتى 1،2%-عا ارتقان. قىزمەت كورسەتۋ سەكتورىنداعى ءوسىم شاعىن جانە ورتا بيزنەستىڭ جاندانعانىن بىلدىرەدى. بۇل جاڭا جۇمىس ورىندارىنىڭ اشىلۋىنا جانە ازاماتتاردىڭ ءال-اۋقاتىنىڭ جاقسارۋىنا ىقپال ەتەدى.