بۇگىن الماتى قالاسىنىڭ وڭىرلىك كوممۋنيكاسيالار قىزمەتى «بيۋدجەتكە قاتىسۋ» جوباسى اياسىندا قالا تۇرعىندارىنىڭ باستاماسىمەن جۇزەگە اسىرىلىپ جاتقان نىساندار بويىنشا باسپا ءسوز تۋرىن ۇيىمداستىردى. «بيۋدجەتكە قاتىسۋ» - بۇل ءوزارا ءىس-قيمىل تەتىگى، مۇندا الماتىلىقتار بيۋدجەت قاراجاتى ەسەبىنەن اۋلا الاڭدارىن جاقسارتىپ، جاڭا گۇلزارلار نەمەسە تروتۋارلار سالا الادى.

الماتى قالاسىنىڭ اكىمى باقىتجان ساعىنتايەۆ قالا تۇرعىندارىن زاماناۋي ستاندارتتارعا سايكەس كەلەتىن ىڭعايلى، جايلى جانە ءقاۋىپسىز قوعامدىق كەڭىستىكتەرمەن قامتاماسىز ەتەتىن ساپالى قالالىق ورتانى قالىپتاستىرۋعا ەرەكشە نازار اۋداراتىنىن اتاپ وتكەن ءجون. تۇرعىندار ءوز كەزەگىندە اۋداننىڭ، كوشەنىڭ، اۋلانىڭ قالالىق كەلبەتىن جاقسارتۋعا ءوز ۇلەستەرىن قوسا الادى. ول ءۇشىن ءوتىنىمدى وسى جىلدىڭ 20 قازانىنا دەيىن budget.open-almaty.kz سايتىندا بەرۋ قاجەت. ساراپتاما كوميسسياسى سمەتانى جانە وزگە دە قۇجاتتامانى دايىنداۋ ماسەلەلەرىندە جاردەم كورسەتەدى. قانداي يدەيالار ىسكە اسىرىلاتىنى تۋرالى شەشىمدى وسى اۋداننىڭ اۋماعىندا تۇراتىن قالا تۇرعىندارىنىڭ وزدەرى قابىلدايدى. اعىمداعى جىلى ءاربىر اۋدانعا 800 ملن تەڭگە ءبولىندى، بۇل رەتتە ءبىر جوبانىڭ سوماسى 55،5 ملن تەڭگەدەن اسپاۋى ءتيىس.

جالپى، وسى جوبانىڭ ارقاسىندا قالا تۇرعىندارى "شەتسىز قالا" قاعيداسىنا سايكەس تۇرعىلىقتى جەرىنە قاراماستان جالپى پايدالانۋ ورىندارىن جاقسارتىپ، دەمالىس پەن بوس ۋاقىتتى وتكىزۋ ءۇشىن قولايلى جاعدايلاردى قامتاماسىز ەتە الادى.

ارنايى باسپا ءسوز تۋرى بارىسىندا پايدالانۋعا بەرىلگەن نىساندار نەمەسە ىسكە اسىرۋدىڭ سوڭعى ساتىسىندا تۇرعان جوبالار تانىستىرىلىپ، قاتىسۋشىلار ارالاپ كوردى. اتاپ ايتقاندا، قاتىسۋشىلار نەگىزىنەن كەيىننەن قوسىلعان قالانىڭ ءتورت اۋدانىندا ورنالاسقان اباتتاندىرىلعان ساياباقتارعا، بالالار ويىن جانە سپورت الاڭدارىنا باردى.

باسپا ءسوز تۋرىنا قاتىسۋشىلار تۇركسىب اۋدانىنداعى بالالاردىڭ ويىن الاڭىن، جەتىسۋ اۋدانى اينابۇلاق-1 شاعىن اۋدانداعى ساياباقتى، ناۋرىزباي اۋدانىنداعى باسكەتبول، فۋتبول جانە Workout الاڭدارىن، مەدەۋ اۋدانىنىڭ سامال-1 شاعىن اۋدانىنداعى ساياباقتى ارالاپ كوردى.

ودان بولەك، قاتىسۋشىلار ناۋرىزباي اۋدانىنداعى قالقامان-2 شاعىن اۋدانىنا بارىپ، وندا باسكەتبول، فۋتبول جانە workout الاڭدارىن ارالادى. بۇل اۋماقتا شاعىن ارحيتەكتۋرالىق فورمالار ورناتىلىپ، رەزەڭكە توسەمدەر سالىندى. ناۋرىزباي اۋدانى تۇرعىندارىنىڭ باستاماسىمەن 7 جوبا ىسكە اسىرىلدى. ولاردىڭ كوبى ىرگەلەس اۋلالاردى، ساياباقتاردى اباتتاندىرۋعا، بالالار جانە سپورت الاڭدارىن ورناتۋعا قاتىستى.

«اعىمداعى جىلى ناۋرىزباي اۋدانىندا «بيۋدجەتكە قاتىسۋ» جوباسىنىڭ اياسىندا 6 بالالار، سپورتتىق الاڭدار سالىندى. مۇندا قالقامان-2 شاعىن اۋدانىندا ءۇش نىسان: سكەيتبورد، باسكەتبول الاڭى، workout ايماعى بار. جوبانىڭ اياسىندا كوگالداندىرۋ، اۋماقتى جارىقتاندىرۋ قاراستىرىلعان»، - دەپ تولىقتىردى ناۋرىزباي اۋدانى اكىمى اپپاراتىنىڭ اباتتاندىرۋ ءبولىمىنىڭ باس مامانى وڭالبەك قىدىربايەۆ.

ودان كەيىن باسپا ءسوز تۋرىنىڭ قاتىسۋشىلارىنا جەتىسۋ اۋدانى اينابۇلاق-1 شاعىن اۋدانداعى گۇلزار تانىستىرىلدى، بۇگىندە مۇنداعى جۇمىستار اياقتالعان. اۋماعى 2400 شارشى مەتر بولاتىن ساياباق اۋماعىندا رەزەڭكە جامىلعى توسەلىپ، اسفالت توسەلدى. ورىندىقتار، ۋرنالار ورناتىلعان، 2 workout الاڭى بار.

«بۇل ۋچاسكە ءشوپ باسىپ كەتكەن بوس جاتقان جەر بولاتىن. «بيۋدجەتكە قاتىسۋ» جوباسىنىڭ اياسىندا اتالعان جوبانى تۇرعىندارمەن بىرلەسىپ جاساپ، ولاردىڭ ۇسىنىستارىن قابىلدادى. بۇل اۋماقتا تۇرعىنداردىڭ پايدالانۋى ءۇشىن بارلىعى قاراستىرىلعان»، - دەپ اتاپ ءوتتى جەتىسۋ اۋدانى اكىمى اپپاراتىنىڭ اباتتاندىرۋ ءبولىمىنىڭ باس مامانى ەرنار باتىروۆ.

باسپا ءسوز تۋرىنا قاتىسۋشىلار تۇركسىب اۋدانى، بەكماحانوۆ كوشەسى بويىنداعى سپاسسكايا كوشەسىنىڭ بۇرىشىنداعى بالالار ويىن الاڭىنىڭ اعىمداعى جوندەۋ جۇمىستارىمەن تانىستى. ونىڭ جانىندا فۋتبول الاڭى بار. الاڭ ويىن جابدىقتارىمەن، شاعىن ساۋلەت فورمالارىمەن جابدىقتالعان. جارىق تارتىلعان، ورىندىقتار مەن ۋرنالار بار. الاڭدار 11 كوپ پاتەرلى جانە 80-نەن استام جەكە تۇرعىن ۇيلەرگە جاقىن ورنالاسقان.

«بۇل جەردە، كورىپ وتىرعاندارىڭىزداي، بالالار الاڭىنىڭ اعىمداعى جوندەۋ جۇمىستارى بويىنشا جۇمىستار جالعاستىرىلدى. جۇمىستى اۋداننىڭ مەردىگەر ۇيىمدارى جۇرگىزدى، ول جۇمىستار مامىر ايىندا باستالىپ، شىلدەدە اياقتالدى. سودان بەرى تۇرعىندار وسى الاڭدى پايدالانۋدا. جالپى، 2019-2020 جىلدارعا ارنالعان «بيۋدجەتكە قاتىسۋ» جوباسىنىڭ اياسىندا تۇركسىب اۋدانىندا بەس جوبا جۇزەگە اسىرىلدى»، - حابارلادى تۇركسىب اۋدانى اكىمى اپپاراتىنىڭ اباتتاندىرۋ ءبولىمى باسشىسىنىڭ مىندەتىن اتقارۋشى رايحان نۇرپەيىسوۆا.

باسپا ءسوز تۋرى بارىسىندا مەدەۋ اۋدانى سامال-1 شاعىن اۋدانىنداعى ساياباقتى اباتتاندىرۋ جوباسى تانىستىرىلدى، بۇگىندە مۇندا جوندەۋ جۇمىستارى ءالى دە جۇرگىزىلۋدە. ساياباق اۋماعىنداعى قوعامدىق كەڭىستىكتى جايلاستىرۋمەن بىرگە جاسىل ايماقتى دامىتۋ جانە جالپى قالالىق ورتانى جاقسارتۋ كوزدەلگەن. ساياباقتا سپورت الاڭى پايدا بولادى، ورىندىقتار مەن ۋرنالار ورناتىلادى. جارىقپەن قامتاماسىز ەتۋ ءۇشىن كابەل توسەلەدى، 15 جارىقتاندىرۋ تىرەكتەرىمەن جابدىقتالعان. گازون توسەلىپ، 30 ءتۇپ كوشەت جانە 50 بۇتا وتىرعىزىلعان.

«بۇل جوبانىڭ اۆتورلارى وسى شاعىن اۋداننىڭ تۇرعىندارى. جوبانى كوميسسيا ماقۇلداپ، باسقا تۇرعىندار دا قولدادى. ول ءبىراۋىزدان قابىلداندى، جولداسبەكوۆ كوشەسىنىڭ بويىندا بالالار الاڭدارى جەتكىلىكتى بولاتىن، الايدا ۇلكەندەرگە، سونىڭ ىشىندە قارت ادامدارعا ارنالعان سپورت الاڭدارى جوق بولاتىن»، - دەپ اتاپ ءوتتى مەدەۋ اۋدانى اكىمى اپپاراتىنىڭ اباتتاندىرۋ ءبولىمىنىڭ باسشىسى ماقسۇت نۇرعالييەۆ.