قازاقستاننىڭ پرەمەر-مينيسترى اسقار مامين الماتىدا Hyundai اۆتوموبيلدەرىن قۇراستىرۋ زاۋىتىنىڭ اشىلۋ راسىمىنە قاتىستى، دەپ حابارلادى مينيسترلىكتىڭ رەسمي سايتى.

تەلەكوپىر فورماتىندا وتكەن زاۋىتتىڭ اشىلۋ سالتاناتىنا كورەيا رەسپۋبليكاسىنىڭ ساۋدا، يندۋستريا جانە ەنەرگەتيكا ءمينيسترى سون يۋن مو، قازاقستان رەسپۋبليكاسىنىڭ يندۋستريا جانە ينفراقۇرىلىمدىق دامۋ ءمينيسترى ب. اتامقۇلوۆ، «Hyundai Motor Company» پرەزيدەنتى لي ۆون جانە «Astana Group» پرەزيدەنتى ن.سماعۇلوۆ قاتىستى.

پرەمەر-مينيستر سايتىنىڭ حابارلاۋىنشا، زاۋىت الەمدىك اۆتوموبيل جاساۋدىڭ زاماناۋي تەحنولوگيالارى مەن ەكولوگيالىق ستاندارتتار تالاپتارىن ەسكەرە وتىرىپ سالىنعان. كاسىپورىننىڭ جوبالىق قۋاتتىلىعى ءبىرىنشى كەزەڭدە جىلىنا 30 مىڭ بىرلىكتى، ەكىنشى كەزەڭدە جىلىنا 45 مىڭ بىرلىككە دەيىن قۇرايدى. ينۆەستيسيالاردىڭ جالپى كولەمى 28 ملرد تەڭگەدەن اسادى. شەكتەس سالالاردى ەسكەرە وتىرىپ، 1000-نان استام جاڭا جۇمىس ورىندارى قۇرىلدى. الداعى ۋاقىتتا اۆتوكومپونەنتتەر شىعاراتىن زاۋىت اشۋ كوزدەلگەن، بۇل 51%-دان استام جەرگىلىكتەندىرۋدى قامتاماسىز ەتۋگە جانە تمد ەلدەرىنە ەكسپورتقا شىعۋعا مۇمكىندىك بەرەدى.

– 2020 جىلدىڭ 9 ايىندا اۆتوموبيل جاساۋ سالاسىنداعى ءوندىرىس كولەمى 50%-دان استامعا ۇلعايدى. بۇل سالا جوعارى بىلىكتى جۇمىس ورىندارىن اشۋعا جانە قوسىلعان قۇنى جوعارى ءونىم شىعارۋعا مۇمكىندىك بەرەدى، – دەدى مامين.

جۇمىس ساپارى اياسىندا ۇكىمەت باسشىسى الماتى قالاسىنداعى جەو-2 ارالاپ، وندا ەلەكتر ستانسياسىن جاڭعىرتۋ جانە گازعا اۋىستىرۋ تۇجىرىمداماسىمەن تانىستى.

ىلە الاتاۋى مەملەكەتتىك ۇلتتىق تابيعي پاركىندە پرەمەر-مينيسترگە قازاقستاندا ەكولوگيالىق ءتۋريزمدى دامىتۋ جوبالارى تانىستىرىلدى.