ۇلتتىق قوعامدىق سەنىم كەڭەسى وتىرىسىندا مەملەكەت باسشىسى ۇلتتىق جانە مەملەكەتتىك جوعارى وقۋ ورىندارىن تەك مەملەكەت مەنشىگىندە قالدىرۋ تۋرالى تاپسىرما بەردى. بۇل تۋرالى ق ر ءبىلىم جانە عىلىم ءمينيسترى اسحات ايماعامبەتوۆ Facebook پاراقشاسىندا جاريالادى.
قازىرگى ۋاقىتتا مەملەكەتتىك جوعارى وقۋ ورىندارى كوممەرسيالىق ەمەس اكسيونەرلىك قوعامعا اينالدى. قۇرىلىمنىڭ وزگەرۋىنەن كەيىن ەل ىشىندە سول ۋنيۆەرسيتەتتەردىڭ جەكەمەنشىككە ساتىلۋى مۇمكىن دەگەن كۇدىك پايدا بولدى.
– پرەزيدەنت مەملەكەتتىك جوعارى وقۋ ورىندارىنىڭ ساتىلمايتىنى تۋرالى ناقتى ايتتى. بۇل – وتە ماڭىزدى. سەبەبى سول جوو-لاردا ەلىمىزدەگى ستۋدەنتتەردىڭ 40%-ى وقيدى جانە 35 مىڭنان استام وقىتۋشى مەن قىزمەتكەر جۇمىس ىستەيدى. ولاردىڭ باسىم بولىگى XX عاسىردىڭ 30-40 جىلدارى قۇرىلدى جانە تاريحي تۇرعىدان دا ەلىمىزدىڭ باستى سالالىق جوعارى وقۋ ورىندارى بولىپ تابىلادى، – دەيدى ايماعامبەتوۆ.
قازىرگى ۋاقىتتا جوعارى وقۋ ورىندارىنىڭ 50%-ى جەكەمەنشىك. ال بۇل ءوز كەزەگىندە مەملەكەتتىك جوو-نى جەكەشەلەندىرۋ وتاندىق ءبىلىم بەرۋ جۇيەسىنىڭ، عىلىمي-زەرتتەۋ جانە يننوۆاسيالىق قىزمەتىنىڭ تۇتاستىعىنا ورنى تولماس زيان كەلتىرىپ، ۋنيۆەرسيتەتتەردىڭ مۇلىكتىك كەشەنىنىڭ بۇزىلۋىنا دا سەبەپ بولۋى مۇمكىن ەكەنى ايتىلدى.
– وسىلايشا، پرەزيدەنتتىڭ تاپسىرماسى بويىنشا مەملەكەتتىك ۋنيۆەرسيتەتتەر كوممەرسيالىق ەمەس اكسيونەرلىك قوعامدار فورماسىنا اۋىسقانىمەن جەكەشەلەندىرىلمەيدى جانە مەملەكەت مەنشىگىندە قالادى. بۇل رەتتە ولار اكادەميالىق تۇرعىدا الدەقايدا ەركىن جانە قوعام الدىندا ەسەپ بەرىپ، بارىنشا اشىق جۇمىس ىستەي الادى، – دەدى مينيستر.
