قىرعىزستاننىڭ بۇرىنعى پرەزيدەنتى المازبەك اتامبايەۆتى ۇلتتىق قاۋىپسىزدىك جونىندەگى مەملەكەتتىك كوميتەتتىڭ تەرگەۋ يزولياتورىنان بىشكەكتەگى №1 تەرگەۋ يزولياتورىنا اۋىستىردى. بۇعان قارسىلىق رەتىندە ەكس-پرەزيدەنت اشتىق جاريالادى. بۇل تۋرالى 24.kg سايتى حابارلادى. 

المازبەك اتامبايەۆتىڭ قورعاۋشىسى زامير جووشيەۆتىڭ ايتۋىنشا، بۇرىنعى پرەزيدەنتتى جەرتولەدە ۇستاپ وتىر، بۇرىن ءولىم جازاسىنا كەسىلگەندەر سول جەرگە قامالاتىن.

اتامبايەۆتىڭ دەنساۋلىعى ناشار ەكەنى، وكپەسى قابىنعانى، جۇرەگى اۋىراتىنى حابارلاندى.

– سوڭعى كەزدەرى ول كامەرادا ەشكىم بولماعان، ول جاققا ەندى عانا جىلۋ جۇيەسىن قوستى، قۇبىر جۇيەسى ىستەمەيدى، كامەرا ەسىكتەرى ۇنەمى اشىق تۇرادى. المازبەك اتامبايەۆ اشتىق جاريالادى، – دەيدى جووشيەۆ.

بۇرىنعى پرەزيدەنت المازبەك اتامبايەۆ بىشكەكتەگى الاڭدا تارتىپسىزدىك ۇيىمداستىردى دەگەن كۇدىكپەن 10 قازاندا ۇستالعان ەدى. ول وزگە دە بۇرىنعى شەنەۋنىكتەرمەن بىرگە 6 قازانعا قاراعان ءتۇنى دەمونسترانتتار تالابىمەن بوساتىلعان بولاتىن.

ونىڭ ۇستىنەن 2019 جىلى كوي-تاشتاعى وقيعاعا بايلانىستى "ادام ءولتىرۋ"، "ادامداردى كەپىلدىككە الۋ"، "جاپپاي تارتىپسىزدىك"، "بۇزاقىلىق"، "بيلىك وكىلىنە كۇش قولدانۋ" باپتارى بويىنشا قىلمىستىق ىستەر قوزعالعان. اتامبايەۆ پەن وزگە دە ايىپتالۋشىلار ايىپتاردى جوققا شىعارادى.

2020 جىلى جازدا بىشكەك اۋداندىق سوتى قىلمىستىق توپ جەتەكشىسى ازيز باتۋكايەۆتى زاڭسىز بوساتۋ ىسىنە قاتىسى بار دەپ ايىپتالعان اتامبايەۆتى 11 جىل 2 ايعا باس بوستاندىعىنان ايىرعان ەدى. سوت ونىڭ مۇلكىن تاركىلەپ، مەملەكەتتىك ناگرادالارى مەن اتاقتارىنان ايىرعان. كەيىنىرەك بىشكەك قالالىق سوتى ۇكىمدى وزگەرىسسىز قالدىردى. كوي-تاشتاعى وقيعا بويىنشا سوت ازىرگە شەشىم قابىلدامادى.