وسكەمەن قالاسىنىڭ اكىمى جاقسىلىق ومار Instagram-داعى جازباسىنا پىكىر قالدىرعان جەلى قولدانۋشىسىنا "وسى ءسوزىڭ ءۇشىن جاۋاپ بەرەسىڭ" دەپ جازۋىنىڭ سەبەبىن ءتۇسىندىردى. بۇل تۋرالى egemen.kz سايتى حابارلادى. 

Sandra_ouz بۇركەنشىك ەسىمدى ازامات وسكەمەن قالاسى اكىمىنىڭ "وسى ءسوزىڭ ءۇشىن جاۋاپ بەرەسىڭ" دەپ جازعانىن سكرينشوت جاساپ جەلىگە جاريالاعان بولاتىن. ونىڭ ايتۋىنشا، شاھار باسشىسى تانىسىنا سىني پىكىر قالدىرعانى ءۇشىن وسىلاي دەگەن. ۇزاماي جاقسىلىق ومار بۇلاي جازۋىنىڭ سەبەبىن ءتۇسىندىردى.

– كەشە الەۋمەتتىك جەلىدە مەنىڭ جەكە باسىما قاتىستى ەشقانداي فاكتىلەرگە سۇيەنبەي، قۇر ەموسيامەن جازىلعان پىكىردى كوردىم. مەنى قالا باسشىسى رەتىندە ەكىجۇزدى دەپ ايىپتاۋ قورلىق دەپ سانايمىن. ارينە، ءوزىمنىڭ ار-نامىسىما تيگەن مۇنداي دالەلسىز ءسوزدى ەلەۋسىز قالدىرا المايمىن. ونىڭ ۇستىنە، سول ادامعا بىرەۋدى قورلاۋدىڭ جاۋاپكەرشىلىگى بولاتىنى تۋرالى ەسكەرتكەنىمدە، ول مۇنى قورقىتۋ دەپ قابىلدادى. مەن ءاردايىم دالەلدى، نەگىزى بار تالاپتاردى تىڭداۋعا دايىنمىن. ءبىراق بارلىقتارىڭىز سياقتى جەكە باسىما قاتىستى قورلىققا شىدامايمىن. مۇنداي قورلىق اتقارۋشى بيلىك پەن تۇرعىندار اراسىنداعى ءتيىمدى ديالوگقا جات. سىزدەر بۇل وقيعاعا تۇسىنىستىكپەن قاراپ، وبەكتيۆتى باعا بەرەدى دەپ سەنەمىن، –  دەدى ج.ومار.

اكىم سوزىندە جازباسىنا پىكىر قالدىرعان ازاماتتى زاڭ اياسىندا جاۋاپقا تارتقىسى كەلەتىنىن جەتكىزدى.