الماتى وبلىسىندا كارانتين شارالارى كۇشەيتىلەدى، دەپ حابارلادى zakon.kz سايتى.

سايت مالىمەتىنشە، الماتى وبلىسىنىڭ باس مەملەكەتتىك سانيتار دارىگەرى ە.سىدىمانوۆ 28 قازانداعى "الماتى وبلىسىنىڭ اۋماعىندا كارانتين رەجيمى جانە كەيبىر شەكتەۋ شارالارىن ەنگىزۋ تۋرالى" قاۋلىسىنا قول قويدى. قاۋلى بويىنشا 29 قازاننان باستاپ وڭىردە تاماقتانۋ ورىندارىندا ادام قابىلداۋ 50-دەن 30-عا دەيىن قىسقارتىلادى؛ 30-دان اسا ادام قابىلدايتىن مەيرامحانا، كافە مەن اسحانالار جابىلادى.

الدىنداعى قاۋلىدا ءبىر ۇستەلدە 4-6 ادامنان استام وتىرۋعا تىيىم سالىنادى دەلىنسە، ەندى 4-تەن اسىرماۋ جايى ناقتىلاندى. تاماقتانۋ ورىندارىنىڭ جۇمىس كەستەسى وزگەرىسسىز قالدىرىلدى: ساعات 9-00-دەن 22-00-گە دەيىن. ءبىراق جاڭا قاۋلىدا ولارعا تەك جۇمىس كۇندەرى جۇمىس ىستەۋگە رۇقسات بەرىلگەن. ال دەمالىس كۇندەرى تەك ۇيگە تاماق جەتكىزۋ قىزمەتى تۇرىندە عانا جۇمىس ىستەي الادى.

ودان بولەك مەكتەپكە دەيىنگى بارلىق ۇيىمداردىڭ جۇمىسىنا تىيىم سالىندى (تەك 15 بالا قابىلداعان كەزەكشى توپتار جۇمىس ىستەيدى).

ورنالاسقان ورنىنا قاراماستان، بارلىق باسسەيندەر جابىلادى.

سپورت نىساندارىندا دا كىسى قابىلداۋ 50-دەن 30 پايىزعا قىسقارتىلدى. ۇلتتىق قۇراماعا جاتتىعۋ وتكىزۋگە رۇقسات بەرىلەدى. سونداي-اق كورەرمەندەردىڭ قاتىسۋىنسىز وليمپيادا مەن ەل بىرىنشىلىكتەرىن دە وتكىزۋگە رۇقسات.

دەمالىس جانە مەرەكە كۇندەرى بارلىق ساۋدا ۇيلەرى مەن ساۋدا، ويىن-ساۋىق ورتالىقتارى جابىلادى. بۇل نىسانداعى ازىق-تۇلىك جانە ءدارىحانا بولىمدەرى عانا جۇمىس ىستەيدى.

مەملەكەتتىك قىزمەت پەن كاسىپكەرلىك سالا باسشىلىعى جۇمىسشىلارىنىڭ 50-60 پايىزىن قاشىقتان جۇمىس ىستەۋگە كوشىرۋگە مىندەتتى.