مۇعالىمدەردىڭ كاسىبي مەرەكەسى قارساڭىندا الماتى اكىمى باقىتجان ساعىنتايەۆ مەگاپوليس پەداگوگتارىن قۇتتىقتادى جانە «جىل ءمۇعالىمى» بايقاۋىنىڭ جەڭىمپازدارىنا باعالى سىيلىقتار مەن اقشالاي گارنتتاردى تاپسىردى.

الماتى تا-نىڭ تىكەلەي ەفيرىندە كورسەتىلگەن شاراعا پەداگوگ ارداگەرلەر، مۇعالىمدەر جانە ءبىلىم ۇيىمدارىنىڭ باسشىلارى قاتىستى.

مەرەكەلىك ءراسىم بارىسىندا مۇعالىمدەر — «الماتىنىڭ جىل ءمۇعالىمى» جانە «الماتى قالاسى اكىمىنىڭ ارنايى گرانتى» قالالىق بايقاۋلارىنىڭ، سونىمەن قاتار «ۇزدىك پەداگوگ» رەسپۋبليكالىق بايقاۋى قالالىق تۋرىنىڭ جەڭىمپازدارى ۇلىقتالدى.

«الماتىنىڭ جىل ءمۇعالىمى» جانە «الماتى قالاسى اكىمىنىڭ ارنايى گرانتى» قالالىق بايقاۋلارى الماتى اكىمى ب. ساعىنتايەۆتىڭ باستاماسى بويىنشا وتكەن جىلى العاش رەت ۇيىمداستىرىلعان ەدى، ونىڭ ماقساتى — ءمۇعالىم ماماندىعىنىڭ بەدەلىن ارتتىرۋ، وزىق پەداگوگيكالىق تاجىريبەنى كەڭىنەن تاراتۋ.

«جىل ءمۇعالىمى» قالالىق بايقاۋىنىڭ گران-پري جۇلدەگەرى №133 مەكتەپتىڭ وقىتۋشىسى ماقپال شۇكەيەۆاعا 2 بولمەلى پاتەردىڭ كىلتى، ال 1 ورىندى جەڭىپ العان №140 مەكتەپ-گيمنازيانىڭ وقىتۋشىسى داۋرەن ساعىنعالييەۆكە كولىك كىلتى تاپسىرىلدى. قالعان جەڭىمپازدارعا اقشالاي جۇلدەلەر مەن گرانتتار بەرىلدى. ءبىرقاتار مۇعالىمدەر ءبىلىم جانە عىلىم مينيسترلىگىنىڭ ۆەدومستۆالىق ماراپاتتارىمەن اتالىپ ءوتىلدى.

قالانىڭ پەداگوگيكالىق قاۋىمداستىعىن قۇتتىقتاعان الماتى اكىمى ب. ساعىنتايەۆ ۇستازداردىڭ ەڭ مارتەبەلى ميسسيا — وسكەلەڭ ۇرپاققا تاربيە مەن ءبىلىم بەرەتىندەرىن اتاپ ءوتتى.

«مۇعالىمدەرگە زور جاۋاپكەرشىلىك جۇكتەلىپ وتىر، ويتكەنى بولاشاقتا ەلىمىزدە قانداي ۇرپاقتىڭ ءومىر ءسۇرىپ، ەڭبەك ەتەتىنى ۇستازدارعا تىكەلەي بايلانىستى. سوندىقتان، تەك ءمۇعالىم عانا ءبىلىم بەرۋدەگى باستى كەيىپكەر بولىپ تابىلادى»، — دەدى قالا اكىمى باقىتجان ساعىنتايەۆ.

قالا اكىمى ءبىلىم جۇيەسىن دامىتۋ شارالارى، ءبىلىم بەرۋدىڭ جاڭا مەكەمەلەرىن سالۋ، جاس ماماندارعا قولداۋ كورسەتۋ تۋرالى دا ايتىپ ءوتتى. مىسالى، اعىمداعى جىلى قالا مەكتەپتەرىندە وزدەرىنىڭ ەڭبەك جولدارىن باستاعان جاس مۇعالىمدەرگە ماتەريالدىق كومەك رەتىندە بىررەتتىك تولەم بەرۋ پراكتيكاسى جالعاساتىن بولادى. قازان ايىندا جالپى سوماسى 27 ملن تەڭگەدەن اساتىن تولەمدى 549 جاس ءمۇعالىم الدى.

ايتا كەتەرلىگى، قالا مۇعالىمدەرىنىڭ تۇرعىن ءۇي جاعدايىن جاقسارتۋ ماسەلەسىنە ايرىقشا نازار اۋدارىلادى. بۇگىنگى كۇنى جەڭىلدەتىلگەن نەسيە بەرەتىن «الماتى جاستارى 3.0» قالالىق باعدارلاما اياسىندا 187 جاس ءمۇعالىم باسپانالى بولدى.

الماتىنىڭ ءبىلىم جۇيەسىندە 32 مىڭنان استام پەداگوگ بار، ولاردىڭ 500-دەن استامى اعىمداعى جىلى وزدەرىنىڭ العاشقى ەڭبەك جولدارىن باستاعان جاس ماماندار.