2020 جىلدىڭ 1 قازانىندا الماتى قالاسى اكىمدىگىندە قالا باسشىسى مەن اۋدان باسشىلارىنىڭ قاتىسۋىمەن قالالىق ارداگەرلەر كەڭەسىنىڭ اكتيۆىمەن كەزدەسۋ ءوتتى.

كەزدەسۋ بارىسىندا ارداگەرلەر كەڭەسىنىڭ قىزمەتى تالقىلانىپ، وزەكتى ماسەلەلەر تىڭدالدى. الماتى قالالىق ارداگەرلەر كەڭەسىنىڭ ءتوراعاسى اقان بيجانوۆ ءوز سوزىندە كارانتين شارالارىنا قاراماستان ارداگەرلەر كەڭەسى بەلسەندى جۇمىسىن جالعاستىرىپ كەلە جاتقانىن اتاپ ءوتتى.

«ءبىزدىڭ ارداگەرلەر جاستارمەن ۇنەمى كەزدەسىپ وتىردى. اعىمداعى جىلدىڭ اقپان ايىندا ابايدىڭ 175 جىلدىعىنا ارنالعان ناۋرىزباي اۋدانىنىڭ بارلىق مەكتەپتەرىنىڭ وقۋشىلارىمەن كەزدەسۋ ءوتتى. جەتىسۋ اۋدانىندا ارداگەرلەردىڭ بەلسەندى قاتىسۋىمەن ۇلى وتان سوعىسىنداعى جەڭىستىڭ 75 جىلدىعىنا ارنالعان وقۋشىلارمەن كەزدەسۋ ءوتىپ، وقۋشىلاردى جاس پانفيلوۆشىلار قاتارىنا قابىلدادى»، — دەدى ا. بيجانوۆ.

ا.بيجانوۆتىڭ ايتۋىنشا، الماتى قالالىق جانە اۋداندىق ارداگەرلەر كەڭەستەرى الەۋمەتتىك ماسەلەلەر بويىنشا قارت ادامداردى سپورتتىق-ساۋىقتىرۋ جانە بوس ۋاقىت ءىس-شارالارىنا تارتۋ جۇمىستارىن جۇرگىزۋدە.

سونداي-اق، ارداگەرلەر وزدەرىن تولعاندىراتىن ماسەلەلەرمەن ءبولىستى. سونىمەن الماتى قالاسى مەدەۋ اۋداندىق ارداگەرلەر كەڭەسىنىڭ ءتوراعاسى كيم سەرىكبايەۆ كەڭەس قۇرامىندا 8 قالالىق قوعامدىق كوميسسيا جۇمىس ىستەيتىنىن اتاپ ءوتتى. بۇل ورتالىقتاردا ەگدە جاستاعى ادامدار جۇمىس ىستەيدى جانە بۇگىنگى كۇنى ماتەريالدىق-تەحنيكالىق قامتاماسىز ەتۋ ماسەلەسى وتكىر بولىپ تۇر.

ناۋرىزباي اۋداندىق ارداگەرلەر كەڭەسىنىڭ ءتوراعاسى مادەنيەت قاركەنوۆ اۋداندا ءالى كۇنگە دەيىن شەشىلمەگەن ماسەلەلەر بار ەكەنىن اتاپ ءوتتى.

«4 جىل ىشىندە اۋداندا كوپتەگەن جۇمىستار اتقارىلدى، دەگەنمەن پروبلەمالار ءالى دە بار. ناۋرىزباي اۋدانى جاس اۋدان، ستاديونى جوق، جاستار مەن قارتتاردىڭ بوس ۋاقىتىن وتكىزۋگە، قالا تۇرعىندارىنىڭ دەمالۋىنا ارنالعان دەمالىس ورىندارى جەتكىلىكسىز»، — دەدى م. قاركەنوۆ.

قورىتىندىلاي كەلە، الماتى قالاسى اكىمىنىڭ ورىنباسارى ماقسات كيكيموۆ ارداگەرلەردىڭ بارلىق كوتەرگەن ماسەلەلەرى مەن تىلەكتەرى ءوز شەشىمىن تاباتىنىن ايتتى. ول سونداي-اق ارداگەرلەردى حالىقارالىق قارتتار كۇنىمەن قۇتتىقتاپ، ولارعا دەنساۋلىق پەن ۇزاق ءومىر تىلەدى.