فرانسيا پرەزيدەنتى ەممانۋەل ماكرون يسلام دىنىنە قاتىستى كاريكاتۋرا مەن سىزبالاردان باس تارتپايتىنى تۋرالى مالىمدەمە جاسادى. ەگەر ماكرون پوزيسياسىن وزگەرتپەسە، شەشەنستان باسشىسى رامزان كادىروۆ وتستاۆكاعا كەتۋگە دايىن ەكەنىن جەتكىزدى. بۇل تۋرالى ru.euronews.com حابارلادى.
كادىروۆ ءوزىنىڭ telegramm پاراقشاسىندا ماكروننىڭ ارەكەتىنە قاتىستى جازبا جاريالادى. ول فرانسيا باسشىسىن "مۇسىلمانداردى قىلمىس جاساۋعا ۇگىتتەيدى" دەپ نارازىلىق ءبىلدىردى. سونداي-اق كادىروۆ ماكروندى ءدىني شابۋىلدار مەن ارانداتۋشىلىق ارەكەتتەردى كەش بولماي تۇرىپ توقتاتۋعا شاقىردى.
– فرانسۋز بيلىگىنە ساياساتكەر رەتىندە ەمەس، مۇسىلمان رەتىندە پىكىر بىلدىرگەنىمدى ەسكەرۋ قاجەت. ءدىنىمدى شەكسىز سۇيەتىن جانە قاسيەتتى قۇران مەن سۇننەتتىڭ بارلىق شارتتارىن قاتاڭ ساقتايتىن ادام رەتىندەگى قۇقىعىمدى ەسكەرە وتىرىپ، ماكرون تۋرالى بۇرىنعى سوزدەرىمدى مىڭ رەت قايتالاۋعا دايىنمىن. قاجەت بولسا، مەن وتستاۆكاعا كەتۋگە، ازاپ شەگۋگە نەمەسە ءوز ءومىرىمدى بەرۋگە دايىنمىن! ءبىراق دىنسىزدەردىڭ ءدىندى مازاق ەتىپ وتىرعانىنا ءۇنسىز قاراپ وتىرا المايمىن، – دەدى كادىروۆ.
ايتا كەتەيىك، شەتەلدىك ب ا ق قۇرالدارىنىڭ مالىمەتىنشە، يسلامدىق راديكالدى توپتىڭ مۇشەسى مەكتەپ وقۋشىلارىنا "ءسوز ەركىندىگى" ساباعىندا فرانسۋزدىق Charlie Hebdo ساتيرالىق باسىلىمىندا جاريالانعان مۇحاممەد پايعامباردىڭ كاريكاتۋرالارىن كورسەتكەن ءمۇعالىمنىڭ باسىن كەسىپ تاستاعان. فرانسيا پرەزيدەنتى بۇل وقيعانى تەرراكت دەپ باعالىپ، سول ءمۇعالىمدى ەسكە الىپ، ازا تۇتۋ راسىمىنە قاتىستى. سوندا ماكرون ءسوز سويلەپ، فرانسيا مۇسىلماندار كەڭەسىمەن بىرگە "اعارتۋشىلىق يسلامدى" قۇرۋعا كومەكتەسەتىن ۇيىم قۇرۋ كەرەكتىگىن ايتتى. ونىڭ پىكىرىنشە، بۇل ءدىندى "شەتەلدىكتەردىڭ ىقپالىنان بوساتىپ، مەشىتتەردىڭ قارجىلاندىرىلۋىنا باقىلاۋدى كۇشەيتۋ كەرەك". سونداي-اق ماكرون كاريكاتۋرا مەن سىزبالاردان باس تارتپايتىنىن باسا ايتقان.
پىكىر قالدىرۋ