"نۇر-سۇلتان-ششۋچينسك" تاس جولىندا مۋزىكالىق جولاقتار ورناتىلدى. بۇل تۋرالى Qamshy.kz اقپارات اگەنتتىگى حابارلايدى. 

كولىك قوزعالىسىنىڭ قاۋىپسىزدىگىن قامتاماسىز ەتۋ اياسىندا شەتەلدىك (گەرمانيا، كورەيا، اقش، جاپونيا، ت.ب.) تاجىريبەلەرگە نەگىزدەلە وتىرىپ "QazAvtoJol" ۇك" اق نۇر-سۇلتان-ششۋچينسك اقىلى ۋچاسكەسىندە "مۋزىكالىق جولاقتار" پيلوتتىق جوباسى ەنگىزىلدى.

جوبانىڭ ماقساتى – كولىك اپاتىنىڭ ءقاۋپى بار ۋچاسكەلەردە قوزعالىس جىلدامدىعىن تومەندەتۋ.

سۋىق پلاستيكتەن جاسالعان جاڭا ۇلگىدەگى دىبىس جولاقتارى مەن اۆتوكولىك دوڭگەلەكتەرىنىڭ بەلگىلى جىلدامدىقتاعى ۇيكەلىسى ناتيجەسىندە اۋەن ءۇنى ەستىلەدى. بۇل تەحنولوگيا ەلىمىزدە العاش رەت قولدانىلۋدا.

تاجىريبە ناتيجەسى بويىنشا، اۆتوكولىك ساعاتىنا 90 شاقىرىم جىلدامدىقپەن قوزعالعان كەزدە دىبىس جولاقتارىنىڭ ءۇنى وزگەرىپ، جۇرگىزۋشىنىڭ كوڭىلىن اۋدارىپ، جىلدامدىقتى ازايتۋعا سەبەپشى بولادى. "QazAvtoJol"  كەلەر جىلى «مۋزىكالدى جولاقتاردى» قازاقستاننىڭ وزگە جولدارىندا دا ورناتۋدى جوسپارلاۋدا.

اقپارات ءۇشىن:   دىبىس جولاقتارى – بەدەرلى جولاقتار تۇرىندەگى ارنايى جول بەلگىلەرى.

اتالمىش بەلگىلەر جول-كولىك وقيعاسىنىڭ، جىلدامدىقتى اسىرۋ فاكتىلەرىنىڭ، كولىكتى جۇرگىزۋ بارىسىندا ۇيىقتاپ كەتۋدىڭ الدىن-الۋ ءۇشىن قولدانىلادى. اۆتوكولىك بەلگلىەردەن وتكەن كەزدە تەربەلىس (ۆيبراسيا) پايدا بولىپ، جۇرگىۋشىنىڭ جول قوزعالىسى جاعدايىنا نازارىن اۋدارتادى.