نۇر-سۇلتان، 30 قازان، ءماجىلىس ءۇيى. ءماجىلىس ءتوراعاسى نۇرلان نىعماتۋلين جۋرناليستەرگە ارنالعان «پارلامەنت ءسوزى» سىيلىعىنىڭ جەڭىمپازدارىنا ءماجىلىس ءمۇسىنشىسى مەن ديپلومداردى تابىستادى.

بيىل ءتورتىنشى رەت وتكىزىلىپ وتىرعان ءداستۇرلى پارلامەنتتىك سىيلىقتىڭ قورىتىندىسى جاز مەزگىلىندە بۇقارالىق اقپارات قۇرالدارى قىزمەتكەرلەرىنىڭ كاسىبي مەرەكەسى قارساڭىندا شىعارىلعان بولاتىن. الايدا كارانتينگە بايلانىستى ەستەلىك مۇسىنشەلەر مەن لاۋرەاتتاردىڭ ديپلومدارىن تاپسىرۋ ءراسىمى كۇزگى پارلامەنتتىك سەسسياعا اۋىستىرىلدى.

ءماجىلىس ءتوراعاسى «پارلامەنت ءسوزى» سىيلىعىن جەڭىمپازدارعا تابىستاپ، بۇقارالىق اقپارات قۇرالدارىنىڭ ەلىمىزدىڭ دامۋىنداعى، سونداي-اق دەپۋتاتتىق كورپۋس پەن جۋرناليستەردىڭ بىرلەسكەن ناتيجەلى جۇمىسىن اتاپ ءوتتى. نۇرلان ءنىعماتۋليننىڭ ايتۋىنشا، جۋرناليستەردىڭ ءماجىلىس جۇمىسىن ناسيحاتتاپ، دەپۋتاتتاردىڭ قىزمەتىن حالىققا جەتكىزۋدە  قوسقان ۇلەستەرى وتە زور.

«پارلامەنتتىك جۋرناليستيكانى دامىتۋعا قوسقان ۇلەسى ءۇشىن» اتالىمى بويىنشا «Qazaqstan dauiri» باس ديرەكتورى ساۋلە مەشىتبايەۆا جانە «كاراۆان» گازەتىنىڭ باس رەداكتورى يگور شاحنوۆيچكە بەرىلدى.

«ۇزدىك تەليەۆيزيالىق سيۋجەت ءۇشىن» نوميناسياسىن «حابار» تەلەارناسىنىڭ ءتىلشىسى ينديرا جىلقايداروۆا مەن «ەۋرازيا» ءبىرىنشى ارناسىنىڭ» ءتىلشىسى سۆەتلانا پەنكوۆا يەلەندى.

ال، «ۇزدىك باسپا جاريالانىمى ءۇشىن» نوميناسياسىن «ەگەمەن قازاقستان» گازەتىنىڭ ءتىلشىسى تەمىر قۇساينوۆ پەن «ليتەر» گازەتىنىڭ ۇجىمى جەڭىپ الدى.

«ۇزدىك ينتەرنەت جانە راديو ماتەريالى» نوميناسياسىن «Abai.kz» اقپاراتتىق پورتالى جانە سەرىك سابەكوۆ («Kazinform») يەلەندى. «پارلامەنت ءسوزى» سىيلىعىنىڭ «ارنايى رەپورتاج» نوميناسياسىن «قازاق راديولارىنان» قىمبات دوسجان جانە «حابار 24» تەلەارناسىنىڭ كوررەسپوندەنتى مارك بريۋشكو الدى. 

«ۇزدىك بەينە – سۋرەت ماتەريالى ءۇشىن» نوميناسياسىن «Nur Media» ءفوتوتىلشىسى سوۆەتبەك ماعزۋموۆ جانە «حابار» تەلەارناسىنىڭ باس وپەراتورى ەدىل ەرمەكبايەۆ يەلەندى.

سونداي-اق، بيىل الەۋمەتتىك جەلىدەگى ۇزدىكتەر انىقتالدى. ولار «الەۋمەتتىك جەلىدەگى ۇزدىك ماتەريال ءۇشىن» نوميناسياسىن العاش رەت جۋرناليست-بلوگەر وركەن كەنجەبەك جانە YEDILOV ONLINE Telegram-كانالىنىڭ اۆتورى ەربول ەدىلوۆ يەلەندى.

سونىمەن قاتار، ءماجىلىس ءتوراعاسى نۇرلان ءنىعماتۋليننىڭ باستاماسىمەن بيىلعى جىلى «پارلامەنت ءسوزى» ارنايى سىيلىعى» نوميناسياسى مەزگىلسىز دۇنيەدەن وتكەن حالقىمىزعا بەلگىلى جۋرناليست، تانىمال تەلەجۇرگىزۋشى، ارداقتى  ازامات، بەيسەن قۇرانبەكتىڭ قۇرمەتىنە بەرىلىپ،  ارنايى  سىيلىق جارىنا تابىستالدى.  

جەڭىمپازدارعا ءماجىلىس مۇسىنشەلەرى جانە ارنايى ديپلومدار تابىستالدى.