قاسىم-جومارت توقايەۆ "سولتۇستىك ەكونوميكالىق ىنتىماقتاستىق-2020" حالىقارالىق فورۋمىندا بەينەۇندەۋ جاسادى، دەپ حابارلادى اقوردا سايتى.

سايت مالىمەتىنشە، بۇگىن سەۋل قالاسىندا "COVID-19-دان كەيىنگى جاھاندىق وزگەرىستەر جانە سولتۇستىك ەكونوميكالىق ىنتىماقتاستىقتىڭ كەلەشەگى" تاقىرىبىنداعى شارا باستالعان.  

"مەملەكەت باسشىسى وڭتۇستىك كورەيا پرەزيدەنتى مۋن چجە ين باستاماشى بولعان "جاڭا سولتۇستىك ساياسات" ستراتەگياسىن جوعارى باعالادى. ونىڭ وركەندەگەن، ءوزارا بايلانىسى مىعىم جانە تۇراقتى ەۋرازيا قۇرۋ كورەگەن يدەياسىن قۇپتادى.

توقايەۆ قازاقستان مەن وڭتۇستىك كورەيا اراسىنداعى ستراتەگيالىق ىنتىماقتاستىقتىڭ ماڭىزىن ايتا كەلە، ءجۇز مىڭ كورەي قاۋىمداستىعىنىڭ ەكى ەل اراسىنداعى قارىم-قاتىناسقا قوسقان ۇلەسىن اتاپ ءوتتى" دەلىنگەن پرەزيدەنت رەسمي سايتىنىڭ حابارلاماسىندا.

– كورەيانىڭ قازاقستان ەكونوميكاسىنا جاساعان ينۆەستيسياسى 7 ميلليارد دوللاردان استى. جاھاندىق تۇراقسىزدىققا قاراماستان، ەكىجاقتى تاۋار اينالىمى ارتتى. ورتالىق ازيانىڭ بارلىق بەس ەلىنىڭ ورتاق جالپى ىشكى ءونىمنىڭ 70 پايىزى قازاقستاننىڭ ۇلەسىنە تيەسىلى. كورەي مەملەكەتى جەتەكشى ينۆەستورلاردىڭ اراسىنداعى 10-ورىنعا يە. بۇل رەتتە، ءوزارا ءتيىمدى ىنتىماقتاستىقتى ودان ارى جالعاستىرۋدىڭ ءالى دە پايدالانىلماعان ۇلكەن الەۋەتى بار، – دەدى توقايەۆ.

مەملەكەت باسشىسى الەمدەگى ۇزاققا سوزىلعان مۇناي ءداۋىرىنىڭ اياقتالىپ كەلە جاتقانىن ايتىپ، قازاقستان ءۇشىن جان-جاقتى، تۇراقتى ەكونوميكا قۇرۋدىڭ ەرەكشە ماڭىزدى ەكەنىن اتاپ ءوتتى.

– وسىعان بايلانىستى مەن جاڭا ەكونوميكالىق باعىتتىڭ باستاماشىسى بولدىم. بۇل باعىت قۇرىلىمدىق رەفورمالارمەن عانا ەمەس، سونداي-اق بارىنشا قارقىندى ءارى مىقتى مەملەكەت قۇرۋمەن بايلانىستى. قازاقستان كورەي ينۆەستورلارى ءۇشىن ارنايى ازىرلەنگەن قۇرالداردى ۇسىنۋعا ءازىر. بۇل رەتتە، سالىق جانە كەدەن ارتىقشىلىقتارى، جوبالاردى قوسا قارجىلاندىرۋ، ەكسپورتتى قولداۋدىڭ ءىشىنارا كەپىلدىكتەرى مەن تەتىكتەرىن ايتۋعا بولادى، – دەدى ول.

ءسوز سوڭىندا مەملەكەت باسشىسى فورۋم قاتىسۋشىلارىنا جۇمىستىڭ تابىستى بولۋىن، وڭتۇستىك كورەيا پرەزيدەنتى مەن ۇكىمەتىنىڭ باستامالارىنا ساتتىلىك تىلەدى.