پرەمەر-مينيستردىڭ ورىنباسارى ەرالى توعجانوۆ شىعىس قازاقستان وبلىسىنداعى ەپيدەميولوگيالىق جاعدايدى تۇراقتاندىرۋ ماقساتىندا ءبىرقاتار شەكتەۋ شارالارىن قابىلداۋدى تاپسىردى، دەپ مالىمدەدى primeminister.kz سايتى.
ەرالى توعجانوۆ وبلىس اكىمدىگىنە ون كۇن مەرزىم ىشىندە وڭىردەگى ەپيدەميولوگيالىق احۋالدى تۇراقتاندىرۋ بويىنشا تۇبەگەيلى شارالاردى قابىلداۋدى، دەنساۋلىق ساقتاۋ مينيسترلىگىنە كونسۋلتاتيۆتىك-ادىستەمەلىك كومەك كورسەتۋ ءۇشىن جوعارى بىلىكتى مامانداردى وڭىرگە جىبەرۋدى تاپسىردى.
ۆەدومستۆوارالىق كوميسسيا ءتوراعاسىنىڭ شەشىمىمەن شقو-دا تومەندەگىدەي شەكتەۋ شارالارىن ەنگىزىلمەك:
- 2020 جىلدىڭ 2 قاراشاسىنان باستاپ وسكەمەن قالاسىنا كىرۋ جانە شىعۋ بويىنشا اۋە قوزعالىسىن ازايتۋ:
- نۇر-سۇلتان قالاسىنا/نان – اپتاسىنا 17-دەن 7 رەيسكە دەيىن؛
- الماتى قالاسىنا/نان – اپتاسىنا 14-تەن 7 رەيسكە دەيىن؛
- شىمكەنت قالاسىنا/نان – اپتاسىنا 2-دەن 1 رەيسكە دەيىن.
- 2020 جىلدىڭ 2 قاراشاسىنان باستاپ نۇر-سۇلتان – وسكەمەن باعىتى بويىنشا تەمىرجول قاتىناسىن اپتاسىنا 3-تەن 1-گە دەيىن، الماتى – وسكەمەن باعىتى بويىنشا اپتاسىنا 7-دەن 3-كە دەيىن قىسقارتۋ؛
- جولاۋشىلاردىڭ شىعىس قازاقستان وبلىسىنان اۋە جانە تەمىر جول كولىگىمەن شىعۋى ءۇشىن COVID-19 تەرىس ناتيجەسى بار پتر تەستىلەۋىنەن وتكەنى تۋرالى انىقتامانىڭ مىندەتتى تۇردە بولۋىن قامتاماسىز ەتۋ (بەرىلگەن كۇنىنەن باستاپ 3 تاۋلىكتەن اسپايتىن)؛
- ترانزيتپەن وتەتىن تەمىرجول قۇرامدارىنىڭ وبلىس ىشىندە توقتاۋىنا تىيىم سالۋ؛
- سانيتارلىق بەكەتتەردى ورناتا وتىرىپ، شىعىس قازاقستان وبلىسىنا كىرۋدى جانە شىعۋدى شەكتەۋ؛
- وبلىستىڭ باسقا قالالارى/اۋداندارى اراسىندا حالىقتىڭ قوزعالىسىن ساقتاي وتىرىپ، وسكەمەن قالاسىنىڭ اۋماعىنا كىرۋگە جانە شىعۋعا تىيىم سالۋ؛
- دەمالىس جانە مەرەكە كۇندەرى شەكتەۋ شارالارىن كۇشەيتۋ؛
- حالىق اراسىنداعى بايلانىستاردى ازايتۋ ماقساتىندا قوعامدىق كولىكتىڭ قاتىناۋ سانىن ۇلعايتۋ؛
- قىزمەتكەرلەردىڭ كەمىندە 80%-ىن قاشىقتاعى جۇمىس فورماتىنا اۋىستىرۋدى قامتاماسىز ەتۋ؛
- وفلاين فورماتتا جينالىستاردى وتكىزۋگە تىيىم سالۋ؛
- كىرەبەرىستەردە، ليفتىلەردە، اۆتوتۇراقتاردا جانە بالالار وينايتىن الاڭداردا، ازىق-تۇلىك بازارلارىندا جانە ت. ب. جەرلەردە دەزينفەكسيا جۇرگىزۋدى قامتاماسىز ەتۋ؛
- ۆاحتالىق ادىسپەن جۇمىس ىستەيتىن جۇمىسكەرلەردىڭ (ۆاحتاعا كىرۋ جانە شىعۋ كەزىندە) تولىق كولەمدە پتر تەكسەرىلۋىن قامتاماسىز ەتۋ؛
- اۋەجايلارعا، تەمىرجول ۆوكزالدارىنا كۇتىپ الۋشىلار مەن شىعارىپ سالۋشىلاردىڭ كىرۋىنە تىيىم سالۋ (قولىندا بيلەتى بولعان جاعدايدا عانا وتكىزۋ)؛
- ادامدار كوپ جينالاتىن ورىندارعا ەرەكشە نازار اۋدارا وتىرىپ، مونيتورينگتىك توپتاردىڭ كارانتين رەجيمىن ساقتاۋ جونىندەگى جۇمىسىن كۇشەيتۋ؛
- كارانتين رەجيمىن ساقتاۋ قاجەتتىلىگى تۋرالى حالىق اراسىندا ءاقپاراتتىق-تۇسىندىرۋ جۇمىستارىن كۇشەيتۋ جونىندە شارالاردى قابىلداۋ.
پىكىر قالدىرۋ