الماتى ماڭىنداعى بايسەركە اۋىلىندا ورنالاسقان دەمالىس ورنىنىڭ يەسى مەن قىزمەتكەرلەرى جانجالداسىپ، وق جاراقاتىن العانى حابارلاندى.

31 قازاندا ساعات 15:50-دە ىلە اۋدانىنىڭ كەزەكشى بولىمىنە "پوليانا" دەمالىس ورنىندا اتىس بولعانى تۋرالى حابارلاما تۇسكەن. پوليسەيلەر وقيعا ورنىنا جەتكەندە ساعات 15:00-گە قاراي مەديسينا ماسكاسىن تاققان 15-20 ادام دەمالىس ورنىنا كەلگەنى جانە سول جەردە مەكەمە يەسىمەن 1980 جىلى تۋعان ەر اداممەن جانجالداسىپ قالعانى انىقتالادى. جانجالداسۋشىلاردىڭ ءبىرى وق اتقان.

بەلگىسىز ادامدار وقيعا ورنىنان سۇر ءتۇستى Mercedes w140 جانە اق ءتۇستى Mercedes كولىگىمەن قاشىپ كەتكەن.

"ك.ن. كۋزنەسوۆتىڭ ىشىنە وق تيگەن (رەزەڭكە وق)، سونداي-اق دەمالىس ورنىنىڭ قىزمەتكەرلەرى 1980 جىلى تۋعان م.س. سلياموۆقا (سول اياعىنا)، 1994 جىلى تۋعان يا.ا. پومازكوۆقا (وڭ اياعىنا) وق تيگەن. م. سلياموۆ جانە يا. پومازكوۆ الماتى قالاسىنداعى № 4 اۋرۋحاناعا جەتكىزىلدى.

اتالعان دەرەك قىلمىستىق كودەكستىڭ 293-بابىنىڭ ("بۇزاقىلىق") 3-بولىگى بويىنشا سوتقا دەيىنگى تەرگەۋدىڭ ءبىرىڭعاي تىزىلىمىنە تىركەلدى. وقيعا ورنىنان 2-9 مم، 2-5،45 مم بولاتىن 4 وقساۋىت، رەزەڭكە وق تابىلدى" دەپ حابارلادى پوليسيا قىزمەتكەرلەرى.

№4 اۋرۋحانا باس دارىگەرىنىڭ ورىنباسارى اناربەك مونگولدىڭ ايتۋىنشا، 31 قازاندا اۋرۋحاناعا ەكى ناۋقاس كەلىپ ءتۇستى. دياگنوزدارى: وڭ جىلىنشىگىنىڭ وق جاراقاتى مەن سول جاق جىلىنشىگىنىڭ اشىق وق جاراقاتى. سونىمەن قاتار، سول جاق اسىقتى جىلىگىنىڭ سىنىعى انىقتالعان. 02.11.2020-داعى جاعداي بويىنشا ناۋقاستاردىڭ جاعدايى ورتاشا اۋىر، ەسىن جينادى، حاتتاما بويىنشا ەم الىپ جاتىر.