بۇگىن الماتىدا اقپارات جانە قوعامدىق دامۋ مينيسترلىگىنىڭ قولداۋىمەن مەملەكەتتىك ءتىلدىڭ قولدانىسىن ارتتىرۋ باعىتىندا ءىس-شارا ءوتتى.

شاراعا قوعام قايراتكەرى، بەلگىلى ساياساتكەر – دوس كوشىم، «اق جول» ساياسي پارتياسى ءتوراعاسىنىڭ ورىنباسارى، ۇلتتىق قوعامدىق سەنىم كەڭەسىنىڭ مۇشەسى، اقىن – قازىبەك يسا، ا. بايتۇرسىنوۆ اتىنداعى ءتىل ءبىلىمى ينستيتۋتىنىڭ باس عىلىمي قىزمەتكەرى، فيلولوگيا عىلىمدارىنىڭ دوكتورى، پروفەسسور – ءالىمحان جۇنىسبەك جانە «لۇعات» قوعامدىق قورىنىڭ ديرەكتورى – ب. قاپالبەك قاتىستى.

شارا بارىسىندا  ب. قاپالبەك  ۇكىمەتتىك ەمەس ۇيىمدار اراسىندا مەملەكەتتىك ءتىلدى دامىتۋ شارالارىنىڭ قورىتىندىسىن تانىستىردى.

سونداي-اق شارادا مەملەكەتتىك ءتىلدىڭ قولدانىلۋىن ارتتىرۋعا باعىتتالعان قۇقىقتىق نەگىزدەر مەن  زاڭنامالىق تالاپتاردى جەتىلدىرۋ جانە كۇشەيتۋ، رەسپۋبليكا بويىنشا رەسمي قۇجاتتاردى رەسىمدەۋدە، كورنەكى اقپارات ۇسىنۋدا جانە قىزمەت كورسەتۋدە  مەملەكەتتىك ءتىلدىڭ قولدانىلۋ دەڭگەيى سىندى وزەكتى ماسەلەلەر تالقىلاندى. 

اقپارات جانە قوعامدىق دامۋ مينيسترلىگى «ازاماتتىق باستامالاردى قولداۋ ورتالىعىنىڭ» تاپسىرىسىمەن «لۇعات» قوعامدىق قورى ۇكىمەتتىك ەمەس ۇيىمداردىڭ قىزمەتىندە مەملەكەتتىك ءتىلدىڭ قولدانىلۋىن ارتتىرۋ  باعىتىندا ءبىرقاتار ءىس-شارالار اتقاردى.

اتاپ ايتار بولساق، ۇكىمەتتىك ەمەس ۇيىمداردىڭ قىزمەتكەرلەرىنە ارنالىپ ەلىمىزدىڭ  6 وڭىرىندە - باتىس قازاقستان، پاۆلودار، سولتۇستىك قازاقستان، اقتوبە، شىعىس قازاقستان وبلىستارى مەن  الماتى قالاسىندا مەملەكەتتىك ءتىلدىڭ  قولدانىسى تاقىرىبىندا وقۋ سەمينارلارى ۇيىمداستىرىلدى.