مەملەكەت باسشىسى قاسىم-جومارت توقايەۆ اۋعانستان پرەزيدەنتى موحامماد اشراف عانيعا كوڭىل ايتۋ جەدەلحاتىن جولدادى. بۇل تۋرالى akorda.kz حابارلادى.
جەدەلحاتتا قاسىم-جومارت توقايەۆتىڭ قابىل ۋنيۆەرسيتەتىندە جاسالعان جانتۇرشىگەرلىك لاڭكەستىك شابۋىل سالدارىنان كوپتەگەن ازاماتتىڭ جازىقسىز قازا تاپقانى تۋرالى سۋىت حاباردى تەرەڭ كۇيزەلىسپەن قابىلداعانى جازىلعان.
– وسىنداي قارالى ساتتە ورنى تولماس قايعىلارىڭىزعا ورتاقتاسىپ، جاقىندارىنان ايىرىلعان وتباسىلار مەن بارشا اۋعانستان حالقىنا قازاقستاندىقتاردىڭ جانە ءوز اتىمنان كوڭىل ايتامىن، – دەپ توقايەۆ قاسىرەتتى وقيعادا زارداپ شەككەن ادامداردىڭ تەز ارادا ساۋىعىپ كەتۋىنە تىلەكتەستىك ءبىلدىردى.
بۇعان دەيىن اۋعانستان مەن يراننىڭ وكىلدەرى قابىل ۋنيۆەرسيتەتىندەگى كىتاپ كورمەسىن اشىپ جاتقان ۋاقىتتا تەرراكت بولعانى حابارلانعان. شابۋىل سالدارىنان 19 ادام قايتىس بولىپ، 12 ادام جاراقات الدى.
پىكىر قالدىرۋ