2020 جىلعى 11-23 قاراشا ارالىعىندا «بيۋدجەتكە قاتىسۋ» قالالىق جوباسى اياسىندا الماتىنى اباتتاندىرۋ بويىنشا تۇرعىنداردىڭ ۇسىنىستارىنا داۋىس بەرۋ وتەدى.

«بيۋدجەتكە قاتىسۋ» جوباسى بويىنشا ءوتىنىم جيناۋ 28 تامىزدا باستالدى. 2020 جىلى جالپى سوما 6،4 ملرد تەڭگەگە دەيىن ارتتى (2019 جىلى 4 ملرد تەڭگە) — ءار اۋدانعا 800 ملن تەڭگەدەن. قالاعا قوسىلعان اۋماقتاردى دامىتۋ ماقساتىندا، ناۋرىزباي جانە الاتاۋ اۋداندارىنا «بيۋدجەتكە قاتىسۋ» اياسىندا قوسىمشا 500 ملن تەڭگەدەن ءبولۋ قاراستىرىلعان. وسىلايشا، اتالعان ەكى اۋداننىڭ ءارقايسىسىنا بولىنگەن قاراجاتتىڭ جالپى سوماسى 1،3 ملرد تەڭگەدەن بولادى.

الماتىلىقتاردىڭ 448 باستاماسى داۋىس بەرۋگە جىبەرىلدى. ەڭ كوپ ءوتىنىم المالى (123)، ناۋرىزباي (72) جانە تۇركسىب (62) اۋداندارىن اباتتاندىرۋ بويىنشا ءتۇستى. ودان كەيىنگى كەزەكتە بوستاندىق (49)، مەدەۋ (42)، الاتاۋ (41)، جەتىسۋ (36) جانە اۋەزوۆ (23) اۋداندارى تۇر.
قالا تۇرعىندارى ۇسىنعان جوبالار قاتارىندا ۇلجان-2 ىقشاماۋدانىندا جەكپە-جەككە ارنالعان كوپفۋنكسيونالدى جازعى سپورت زال، اينابۇلاق-4 ىقشاماۋدانىندا شاحمات ورتالىعىن سالۋ، قالقامان ىقشاماۋدانىندا «راحمەت دارىگەر!» Covid-19 پاندەميا مەموريالىن ورناتۋ جانە ت.ب. بار.

الماتى قالاسىندا تۇراقتى تىركەلگەن تۇرعىندار عانا تاڭداۋ جاساپ، ۇناعان جوبالارعا داۋىس بەرە الادى. ىڭعايلى بولۋ ءۇشىن ونلاين جانە قاعاز تۇرىندە داۋىس بەرۋ مۇمكىندىگى قاراستىرىلعان. قاعاز تۇرىندە اۋداندىق اكىمدىكتەرگە نەمەسە Open Almaty فرونت-وفيسىنە (اباي داڭعىلى، 90) بارىپ داۋىس بەرۋگە بولادى.

ونلاين-داۋىس بەرۋ ءۇشىن:
1) budget.open-almaty.kz پورتالىندا «داۋىس بەرۋ» بولىمىنە ءوتۋ؛
2) ۇناعان 3-تەن (ءۇش) ارتىق ەمەس جوبالىق ۇسىنىستى تاڭداۋ؛
3) داۋىس بەرۋدى راستاۋدىڭ ىڭعايلى ءتاسىلىن تاڭداۋ قاجەت – ەسق نەمەسە جسن (SMS-كود) ارقىلى.

قاعاز تۇرىندە داۋىس بەرۋ ءۇشىن:
1) كەز كەلگەن اۋدان اكىمدىگىنە (ساعات 09.00-18.00، ءۇزىلىس ساعات 13.00-14.00) نەمەسە Open Almaty فرونت-وفيسىنە (ساعات 09.00-20.00) بارۋعا بولادى، وزىڭىزبەن بىرگە جەكە باستى كۋالاندىراتىن قۇجات بولۋى قاجەت؛
2) جەرگىلىكتى جەردە بەرىلگەن قاعاز فورمانى تولتىرۋ؛
3) تولتىرىلعان فورمانى داۋىس جيناۋ جاشىگىنە سالۋ قاجەت.
جوبالىق ۇسىنىس ىسكە اسىرۋعا جىبەرىلۋى ءۇشىن الماتىدا تۇراقتى تىركەلگەن تۇرعىنداردىڭ 10-نان استام داۋىسىن جيناۋى ءتيىس. ءبىر تۇرعىن 3 (ءۇش) جوبالىق ۇسىنىسقا عانا داۋىس بەرە الادى.

انىقتاما: 2019 جىلى الماتى اكىمدىگى قالانىڭ 8 اۋدانىنا جەرگىلىكتى بيۋدجەتتەن 500 ملن تەڭگەدەن ءبولىپ، «بيۋدجەتكە قاتىسۋ» پيلوتتىق جوباسىن ىسكە اسىردى. قالا بيۋدجەتىن نەگە جۇمساۋ كەرەكتىگىن اشىق تالقىلاۋ جانە داۋىس بەرۋ ارقىلى الماتىلىقتاردىڭ وزدەرى انىقتادى. قالا تۇرعىندارىنىڭ باستامالارىنا الماتى قالاسى قوعامدىق كەڭەسىنىڭ مۇشەلەرى، ساراپشىلار، ءماسليحات دەپۋتاتتارى، ۇەۇ وكىلدەرى ءوز باعاسىن بەردى.