الماتىدا «بالا داۋىسى» ۇلتتىق بالالار ءان بايقاۋى 5ء-شى مەرەيتويلىق ماۋسىمىنىڭ جەڭىمپازى انىقتالدى.
كونسەرتتىك باعدارلامانىڭ اقتىق كەزەڭى اياسىندا ۇلكەن ساحنادا ونەر كورسەتۋ مارتەبەسى ەلىمىزدىڭ 17 وڭىرىنەن 20 بالاعا بۇيىرعان بولاتىن. دارىندى جاس انشىلەر 2020 جىلدىڭ 15 ناۋرىزى مەن 15 مامىرى ارالىعىندا وتكەن قاشىقتان ىرىكتەۋ ءتۋرنيرى بارىسىندا 8 بەن 12 جاس ارالىعىنداعى 4 135 ونەرپاز اراسىندا ەرەكشە كوزگە تۇسكەن ەدى.
15 قازاندا «بالا داۋىسى» ۇزدىك ءانى» كونسەرتتىك باعدارلاماسى ءوتتى. وندا اقتىق مارەگە 14 وبلىس پەن شىمكەنت، الماتى جانە نۇر-سۇلتان قالالارىنىڭ اتىنان جولداما العان جاس انشىلەر 2016 جىلدان بەرى بايقاۋ اياسىنداعى اۆتورلىق بالالار اندەرىن ورىندادى.
«بيىل ءبىز ءۇشىن اتاۋلى داتا. بىزگە 5 جىل تولىپ وتىر. جىلدان جىلعا بالالاردىڭ بىرىنەن-بىرى اسىپ تۇسەتىندىگىن بايقادىق. رەپەرتۋار بۇعان دەيىنگى ماۋسىمدارداعى اۆتورلىق اندەردەن بولدى. ارينە، بيىلعى ەپيدەميولوگيالىق احۋالعا بايلانىستى دارىندى بالالاردى ونلاين رەجيمدە ىرىكتەۋ وڭايعا سوققان جوق. بەلگىلى ءبىر قاتىسۋشىنى شاتاستىرىپ الماۋ ءۇشىن وڭىرلەردەگى جازبالاردى قايتا قاراپ شىعۋعا تۋرا كەلدى. ءوزىڭ بارىپ كوزبەن كورگەن ىڭعايلى. بالالاردى جاندى كورۋدى ەشتەڭە دە الماستىرا المايدى»، - دەدى «بالا داۋىسى» بايقاۋىنىڭ مۋزىكالىق پروديۋسەرى فاريدا نيازوۆا.
بايقاۋ قورتىندىسىندا ماڭعىستاۋ وبلىسىنىڭ تۋماسى ارمەن سااكيان 5- ماۋسىم جەڭىمپازى اتانىپ، ۇلتتىق ونەر ۋنيۆەرسيتەتىندە ءبىلىم الۋ گرانتىن يەلەندى.
«مەن ءۇشىن تىم توسىن جايت بولدى. وتە قۋانىشتىمىن. ماعان سەنىم ارتىپ، قولداۋ كورسەتكەن بارشاڭىزعا ريزاشىلىعىمدى بىلدىرەمىن»، - دەيدى ارمەن.
ارمەن سااكيان 6 تىلدە سويلەپ، قوسىمشا ۆوكالمەن اينالىسادى. بوس ۋاقىتىندا سپورتپەن اينالىساتىن ونىڭ مما-دان قازاقستان چەمپيونى اتاعى دا بار.
ال بايقاۋدىڭ ءبىرىنشى جۇلدەسى اقتوبەلىك ايدار اققۇلوۆقا، ەكىنشى جۇلدەسى پاۆلودارلىق لەيلا سەچوۆا مەن جامبىلدىق بەكمۇحامەد عازيجانۇلىنا، ال ءۇشىنشى جۇلدەسى الماتىلىق رۋسلان ءامىراسلانوۆ پەن ماڭعىستاۋلىق ايارۋ قيماعانبەتكە، الماتىلىق ءابىلقايىر جۇماباي مەن اتىراۋلىق ولەسيا كۋلمينگە بۇيىردى. «ەل تاڭداۋ» اتتى تەلەكورەرمەندەر اتىنان ارناۋلى سىيلىق اقتوبە وبلىسىنان كەلگەن 12 جاستاعى ايدار اققۇلوۆقا تابىستالدى.
پىكىر قالدىرۋ