بۇگىن ازاماتتىق بەلسەندى، مارقۇم دۋلات ءاعادىلدىڭ بالاسى جانبولات ءاعادىلدىڭ قايتىس بولعانى حابارلاندى. رەسمي اقپاراتقا سايكەس، دۋلات ءاعادىل 24 اقپاندا جۇرەك تالماسىنان كوز جۇمعان. اكەسىنىڭ قازاسىنان سوڭ جانبولات پەن باۋىرلارى بەكزات، نۇربولات اعادىلدەردىڭ قىسىم كورگەنى تۋرالى ۆيدەو الەۋمەتتىك جەلىدە تارادى. 

1977 جىلى دۇنيەگە كەلگەن دۋلات شاكىر ۇلى ءاعادىل كوپ بالالى انالارعا اراشا ءتۇسىپ، ازاماتتىق قۇقىقتىڭ ساقتالۋىن تالاپ ەتىپ كوزگە تۇسكەن بەلسەندى ەدى. ازاماتتىق پوزيسياسىن اشىق ءبىلدىرىپ، بيلىككە تالاپ قويعانى ءۇشىن بىرنەشە رەت ۇستالعان. 2020 جىلى 24 اقپاندا شامامەن ساعات 21:00-دە پوليسيا قىزمەتكەرلەرى دۋلات ءاعادىلدى ۇيىنەن كۇشتەپ تەرگەۋ يزولياتورىنا الىپ كەتكەن. ال كەلەسى كۇنى ىشكى ىستەر مينيسترلىگى بەلسەندىنىڭ جۇرەك تالماسىنان قايتىس بولعانىن حابارلادى.

دۋلات ءاعادىل قايتىس بولعان سوڭ، بالالارىنا بىرنەشە رەت قىسىم جاسالعانى تۋرالى الەۋمەتتىك جەلىدە اقپارات تارادى.

بەلسەندىنىڭ ۇلى جانبولات ءاعادىل ءوز ويىن، ازاماتتىق پوزيسياسىن الەۋمەتتىك جەلىدە ەركىن بىلدىرەتىن. وتباسى مۇشەلەرى جايلى ايتىلعان قاۋەسەتتەرگە دە جەلىدە جاۋاپ بەرگەن. يۋتۋب جەلىسىندە جاريالانعان ۆيدەودا ولاردىڭ وتباسىسىنا الدەكىمدەردىڭ "ابىلازوۆتەن اقشا الدى" دەپ جالا جاپقانىن ايتتى. ۆيدەو 2020 جىلدىڭ 24 تامىزىندا تۇسىرىلگەن.

"24ء-ى كۇنى مەنىڭ اكەمدى الىپ كەتكەن. ماعان قايعىلى حابارمەن قايتىس بولعانىن ايتتى. "ءابىلازوۆتان اقشا الدى" دەپ، اكەمنىڭ، شەشەمنىڭ اتىن قورلاپ جاتىر. ءابىلازوۆ تۇگىلى، ەشكىمنەن اقشا العان جوقپىز. مەن دە، شەشەم دە، اجەم دە، اعا-ىنىلەرىم دە سويلەسپەگەن بولاتىن. ءبىزدى اقشا الدى دەگەنىنىڭ ءبارى وتىرىك. ەشقانداي اقشا بەرگەن جوق. بىزگە كومەكتەسىپ جاتقان – قاراپايىم قازاق ەلى. مىڭ العىس ايتامىن" دەلىنگەن كادردا جانبولات ءاعادىل.

ماۋسىم ايىندا الەۋمەتتىك جەلىلەردە پوليسيا قىزمەتكەرلەرى بەلسەندىنىڭ ۇلى بەكزات ءاعادىلدىڭ موينىن قىلقىندىرعان ۆيدەو تارادى. ۆيدەونى د.ءاعادىلدىڭ تۋىستارى تۇسىرگەن. پوليسەيلەر "بەلسەندىلەردى تاسىمالداپ ءجۇر" دەگەن سىلتاۋمەن مارقۇمنىڭ ۇلىنا كۇش كورسەتكەن.

وسىدان بەس كۇن بۇرىن 6 قاراشا كۇنى "اينۇر قۇرمانوۆ" Youtube ارناسىندا "پوليسيا ۆنوۆ ارەستوۆالا سىنا دۋلاتا اگاديلا - نۋربولاتا" اتتى ۆيدەو جاريالاندى. ۆيدەودا ازاماتتىق بەلسەندى، مارقۇم دۋلات ءاعادىلدىڭ ۇلى نۇربولات ءاعادىل ءوزىن پوليسەيلەر ەسىل اۋداندىق ىشكى ىستەر بولىمىندە ۇستاپ وتىرعانىن ايتتى.

"مەن ازاماتتىق بەلسەندىمىن. مىنە، مەنى ەسىل اۋداندىق ىشكى ىستەر بولىمىندە ۇستاپ وتىر. ماعان سروچنو ادۆوكات كەرەك. تەلەفونىمدى جۇلىپ الىپ جاتىر. ءقازىر ايقايلاپ قايتارىپ الدىم. مەن ەشقانداي زاڭ بۇزعان جوقپىن. سول سەبەپتى ەشقايدا كىرمەيمىن. ءقازىر تۇنگى ساعات 4:00. ءبىزدى 1،5 ساعاتتان كەيىن بوساتۋى كەرەك" دەگەن نۇربولات ءاعادىل كادردا.

* * *

قامشى ۇجىمى جانبولات ءاعادىلدىڭ وتباسىسىنا قايعىرا كوڭىل ايتادى.