قازاقستان رەسپۋبليكاسىنىڭ سىرتقى ىستەر مينيسترلىگى قاراباقتاعى قاقتىعىسقا قاتىستى مالىمدەمە جاسادى.
مينيسترلىكتىڭ رەسمي سايتىندا جاريالانعان مالىمدەمەدە ازەربايجان پرەزيدەنتىنىڭ، ارمەنيا پرەمەر-مينيسترىنىڭ جانە رەسەي پرەزيدەنتىنىڭ تاۋلى قاراباق قاقتىعىسى ايماعىنداعى اتىستى جانە بارلىق اسكەري ءىس-قيمىلداردى توقتاتۋ تۋرالى مالىمدەمەسىن جوعارى باعالايتىنى جازىلعان.
"قول جەتكىزىلگەن ۋاعدالاستىقتار بۇۇ قاۋىپسىزدىك كەڭەسىنىڭ قارارلارىنا سايكەس كەلەدى جانە تاۋلى قاراباق پروبلەماسىن رەتتەۋ ءۇشىن نەگىز بولا الادى. وسى كەلىسىمگە قول جەتكىزۋدەگى رەسەي فەدەراسياسىنىڭ سىندارلى ءرولىن جانە ونىڭ ۋاعدالاستىقتاردى ءىس جۇزىندە ىسكە اسىرۋعا باعىتتالعان بىتىمگەرشىلىك كۇش-جىگەرىن ەرەكشە اتاپ وتەمىز" دەلىنگەن مالىمدەمەدە.
سونداي-اق ماتىندە ازەربايجان مەن ارميان حالىقتارى بەرىك بەيبىتشىلىك پەن كەلىسىم ورناتۋ، وڭىردە قاۋىپسىزدىكتى قامتاماسىز ەتۋ ءۇشىن سەنىمدى ىرگەتاس قالاۋعا ۇمتىلاتىندارىنا ءۇمىت بىلدىرىلگەن.
پىكىر قالدىرۋ