الماتىدا اباي داڭعىلىنىڭ بويىندا جۋرناليستەر اللەياسى اشىلدى. 

جاروكوۆ پەن گاگارين كوشەلەرىنىڭ اراسىندا ورنالاسقان ساياباقتىڭ اشىلۋ سالتاناتىنا 11 ب ا ق وكىلى، ونىڭ ىشىندە «قامشى» تىلشىلەرى دە قاتىستى.

جۋرناليستەر 175 ۇيەڭكى اعاشىن وتىرعىزدى. ءىس-شارا كارانتيننىڭ بارلىق تالاپتارى ساقتالا وتىرىپ، قالالىق جاسىل ەكونوميكا باسقارماسىنىڭ ۇيىمداستىرۋىمەن ءوتتى.

«ءقازىر - اعاش وتىرعىزۋ ماۋسىمى. بيىل ءبىر ماۋسىمدا 250 مىڭ اعاش وتىرعىزامىز. بۇل سوڭعى 20 جىلداعى رەكوردتىق كورسەتكىش. بىلتىر جانە الدىڭعى جىلدارى ءبىر ماۋسىمدا ەڭ كوپ دەگەندە 40 مىڭ اعاش وتىرعىزعان ەدىك»، - دەدى باسقارما باسشىسى ناتاليا ليەۆينسكايا.

ونىڭ ايتۋىنشا، كوشەت ەگۋ ءبىر بولەك، ونى كۇتىپ باپتاۋ – وزىنشە بولەك ماسەلە.

«ءبىز تەك وتىرعىزىپ قانا قويماي، ونى كۇتىپ باپتاۋعا كوشىپ جاتىرمىز. بۇرىن اعاش وتىرعىزىلسا، ول تۋرالى ۇمىتىلىپ كەتەتىن. ەڭ ءبىرىنشى جىل – جاۋاپتى كەزەڭ. سەبەبى، ءدال سول كەزدە وسىمدىك جاقسى كۇتىمدى تالاپ ەتەدى. اعاش تا ادام بالاسى سياقتى، وتىرعىزعان سوڭ ونى ۇنەمى باپتاپ وتىرۋ كەرەك»، - دەدى باسقارما باسشىسى.

مامانداردىڭ ايتۋىنشا، تالداردى ءبىرىنشى اپتادا 2 رەت، ال ساۋىردەن قاراشاعا دەيىن 72 رەت سۋعارۋ كەرەك.

«بۇگىن ۇيەڭكى وتىرعىزدىق. بۇل اعاش باياۋ وسەدى. تامىرى تەرەڭ بويلامايدى. اعاش وتىرعىزىلاتىن كەزدە بىرنەشە فاكتور ەسكەرىلەدى. ماسەلەن، ينجەنەرلىك جەلىلەر، سۋ، ەلەكتر جەلىلەرى، تەلەفون جەلىلەرىن ەسكەرۋ كەرەك. ءبىز قالانى وسىعان بايلانىستى بىرنەشە ايماققا بولدىك. ءار ايماققا ءتان اعاشتارى بار. بۇگىنگى اللەيادا دەندرولوگتاردىڭ پىكىرىن ەسكەرە وتىرىپ ۇيەڭكى تاڭدالدى»، - دەدى باسقارما باسشىسى.