سەنات دەپۋتاتى ءالي بەكتايەۆ حالىقتى زەينەتاقىمەن قامتاماسىز ەتۋ ماسەلەلەرىن ايتىپ، پرەمەر مينيستر اسقار مامينگە ساۋال جولدادى.
– بۇگىن جانە بولاشاقتا ەڭ تومەن زەينەتاقى الاتىندار اۋىل تۇرعىندارى بولماق. جۇرت قاتارلى زەينەتاقى قورىنىڭ ءبىر بولىگىن الىپ، پايدالانا المايتىندار دا اۋىلدىقتار بولايىن دەپ تۇر. جاقىندا مەن ق ر 2030 جىلعا دەيىنگى مەرزىمگە ارنالعان "زەينەتاقى جۇيەسىن جاڭعىرتۋ" تۋرالى تۇجىرىمداماسىنىڭ جوباسىمەن تانىستىم. اشىعىن ايتۋ كەرەك، اتى دارداي بولعانىمەن اتالعان تۇجىرىمدامادان ەشقانداي جاڭالىق كورگەنىم جوق، – دەدى دەپۋتات.
سەنات دەپۋتاتىنىڭ ايتۋىنشا، ەلدىڭ قازىرگى الەۋمەتتىك جۇيەسى بىتىراڭقى.
– بالالارعا بەرىلەتىن جاردەماقى ەڭ تومەنگى كەدەيشىلىك شەگىنىڭ 70% قۇرايدى. ولاي بولسا، ولاردا وتانعا دەگەن پاتريوتيزم مەن سۇيىسپەنشىلىكتىڭ سول دەڭگەيدە بولاتىنى ايدان انىق. مۇنىڭ بارلىعى قازاقستانعا جاڭا الەۋمەتتىك ساياسات ەنگىزۋ قاجەت ەكەندىگىن كورسەتەدى. جاڭا ساياسات، نەگىزىنەن، بالالاردى قورعاۋ مەن قولداۋعا باعىتتالۋى قاجەت. مەملەكەت بالالاردىڭ ءارقايسىسىن، تۇرمىستىق جاعدايىنا قاراماي، تۋعان كەزدەن 18 جاسقا تولعانعا دەيىن كەپىلدى جانە مىندەتتى تۇردە الەۋمەتتىك قولداۋدىڭ جاڭا ستاندارتتارىن ەنگىزۋى كەرەك. بالالارعا بولىنەتىن بۇل قارجى الەۋمەتتىك كومەك نەمەسە جاردەماقى دەپ تە اتالماۋى ءتيىس. "بالا كاپيتالى" دەگەن اتاۋمەن ارنايى كارتوچكالار ارقىلى ءار بالانىڭ ءوز قاجەتىنە عانا جۇمسالۋى ءتيىس. ارينە، ول بۇگىنگى الەۋمەتتىك ستاندارتتان الدەقايدا جوعارى بولۋى شارت. وعان مەملەكەتتەن قوماقتى قارجى دا ءبولىنۋى كەرەك. ءبىراق، بالالارعا جۇمسالعان كاپيتال ەرتەڭ ەسەلەنىپ قايتاتىنىنا ەشقانداي دا كۇمان جوق. قازاقستاندىقتاردى قالالىق، اۋىلدىق دەپ بولمەي، ولارعا الەۋمەتتىك كەپىلدىكتەرگە بىردەي جاعداي تۋعىزۋ ماقساتىندا بارلىق الەۋمەتتىك بيۋدجەتتى بىرىكتىرەتىن ءبىرىڭعاي الەۋمەتتىك قور قۇرۋ قاجەت. وعان مەملەكەتتىك جانە اتقارۋشى ورگاندار، كۆازيمەملەكەتتىك حولدينگتەر مەن كاسىپكەرلەردىڭ مۇمكىندىكتەرىن جۇمىلدىرۋ ماڭىزدى، – دەدى ءالي بەكتايەۆ.
پىكىر قالدىرۋ