2021 جىلى ءتورت بالالى انالاردىڭ جاردەماقىسى قىسقارادى دەگەن اقپاراتتىڭ راس-وتىرىگى انىقتالدى. بۇل تۋرالى ەۋرازيا ارناسى حابارلادى.

ارنانىڭ مالىمەتىنشە، الەۋمەتتىك جەلىدە 2021 جىلى ءتورتىنشى بالاسىن دۇنيەگە اكەلەتىن انالار كوپبالالى انالاردىڭ ساناتىنا جاتپايدى دەگەن الىپ-قاشپا اڭگىمە تاراعان. اڭگىمەنىڭ راس-وتىرىگىن انىقتاۋ ءۇشىن ەڭبەك مينيسترلىگىنە حات جولداپ، ءمان-جايدى انىقتاعان.

ەڭبەك جانە حالىقتى الەۋمەتتىك قورعاۋ مينيسترلىگى، الەۋمەتتىك كومەك دەپارتامەنتى ديرەكتورىنىڭ ورىنباسارى اسقار نيازوۆ حالىقتىڭ رەسمي اقپاراتتارعا عانا سەنۋ كەرەگىن ايتتى.

– رەسمي اقپارتتارعا عانا سۇيەنۋگە، سەنۋگە شاقىرامىن. جالعان اقپارات تاراتپاڭىزدار. بۇل باعىتتا مەنىڭ ايتارىم – كوپبالالى وتباسىلاردى الەۋمەتتىك قامسىزداندىرۋ ماسەلەسى. 2000 جىلدىڭ باسىنان كەلە جاتقان جۇيەنى الىپ تاستاۋ قارالعان جوق. وزدەرىڭىز بىلەسىزدەر، بيىلعى جىلدان باستاپ، وتباسىنىڭ قۇرامىنداعى بالا سانىنا قاراي الەۋمەتتىك تولەم جۇيەسىن ديففەرەنسيالدى تۇردە تاعايىنداۋدى جۇزەگە اسىردىق، – دەدى ول.

مينيسترلىكتىڭ مالىمەتىنشە، ەلىمىزدە كوپبالالى وتباسىلارعا ارنالعان جاردەماقىنى 400 مىڭعا جۋىق وتباسى الدى. ال 1 شىلدەدەن باستاپ كوپبالالى وتباسىلار مولشەرى وزگەرتىلگەن جاردەماقىعا قول جەتكىزگەن. 

– مىسالى، وتكەن جىلدارى وتباسىلارعا جالپى تولەنەتىن اقشانىڭ كولەمى 10 500 تەڭگەنى قۇراپ وتىردى. قازىرگى تاڭدا 4 بالاسى بار وتباسىعا 44 500 تەڭگەنىڭ كولەمىندە جاردەماقى بەرىلەدى. 5 بالاسى بولسا، 55 مىڭ تەڭگەن كولەمىندە تولەنەدى. ءار بالا سايىن 11 مىڭ تەڭگە كولەمىندە قوسىمشا اقى قوسىلىپ وتىرادى. جاردەماقى بەسىنشى، التىنشى، جەتىنشى بالامەن شەكتەلىپ قالىپ جاتقان جوق. ءتىپتى سەگىزىنشى بالادان باستاپ، ءار بالاعا 4 مرپ-دان قوسىمشا تولەنەدى، – دەدى نيازوۆ.