ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ "ەڭبەك" باعدارلاماسى بويىنشا ايەلدەرگە كرەديت بەرۋ كولەمى ۇلعايتىلعانىن ايتتى. بۇل تۋرالى ول ونلاين رەجيمدە وتكەن اۋىل ايەلدەرىنىڭ III فورۋمىندا مالىمدەدى.

– اۋىلدىڭ وركەندەۋىنە ايەلدەردىڭ قوسىپ جاتقان ۇلەسى وتە زور. ايەلدەردىڭ باستامالارىنا، اۋىل ايەلدەرىنە قولداۋ كورسەتۋ – ماڭىزى بار ءىس. بۇگىن دە ءبىزدىڭ ەڭبەك نارىعى جۇمىسپەن قامتۋشى ايەلدەردىڭ جوعارى دەڭگەيى مەن بىلىكتى قىزمەتكەرلەردىڭ بولۋىمەن سيپاتتالادى. رەسمي ستاتيستيكاعا جۇگىنسەك، ءبىزدىڭ ەلىمىزدە ەكونوميكالىق بەلسەندى حالىقتىڭ سانى 9 ملن 200 مىڭعا جەتتى. ونىڭ جارتىسى – 4،5 ميلليونى ايەلدەر. ولاردىڭ 95 پايىزى جۇمىسپەن قامتىلعان. ونىڭ ىشىندە 1 ملن 100 مىڭى اۋىلدا ەڭبەك ەتىپ جاتقان ايەلدەر، – دەدى مينيستر.

ونىڭ ايتۋىنشا مينيسترلىك ءوز تاراپىنان جۇمىسپەن قامتۋ، كاسىپكەرلىك باستامالاردى قولداۋ، زامانعا ساي داعدىلاردى ۇيرەتۋ باعىتىندا ءبىرقاتار شارۋا اتقارىلىپ كەلەدى.

– ەلىمىزدە ىسكە اسىرىلىپ جاتقان "ەڭبەك" باعدارلاماسى حالقىمىزدى جۇمىسپەن قامتۋعا باعىتتالعان. ءبىزدىڭ باعدارلامادا ايەلدەرگە ەرەكشە باسىمدىق بەرىلگەن. بيىل وسى باعدارلاما بويىنشا 246 مىڭ ايەل قاتىستى. ونىڭ ىشىندە اۋىلدا تۇراتىندارى – 123 مىڭ ادام. وسى جىلى ءبىز ءوز تاراپىمىزدان باعدارلاماعا وزگەرىس ەنگىزىپ، ايەلدەرگە كرەديت بەرۋ شارالارى كەڭەيتىلدى. بىزدە وسى جىلدان باستاپ كوپبالالى انالار، از قامتىلعان وتباسىلار كرەديت الىپ جاتىر. ولار 22 ملن تەڭگەگە دەيىن الا الادى، – دەپ اتاپ ايتتى نۇرىمبەتوۆ.