تۇڭعىش پرەزيدەنت نۇرسۇلتان نازاربايەۆتىڭ توراعالىعىمەن "سامۇرىق-قازىنا" ۇلتتىق ءال-اۋقات قورىن باسقارۋ جونىندەگى كەڭەستىڭ وتىرىسى ءوتتى.

– ءبىزدىڭ بۇگىنگى جيىنىمىز كۇردەلى كەزەڭدە ءوتىپ وتىر. الپاۋىت ەلدەر اراسىنداعى باسەكەلەستىك پەن تەكەتىرەس كۇشەيىپ بارادى. قازاقستان ەكونوميكاسىنا ۇلكەن سالماق تۇسۋدە. سونىمەن بىرگە بۇل جاڭا ەكونوميكالىق مودەل قالىپتاستىرۋ ءۇشىن قاجەتتى رەفورمالار جۇرگىزۋ مۇمكىندىگى، – دەدى نازاربايەۆ.

تۇڭعىش پرەزيدەنت قوردى قايتا قۇرۋ ماسەلەسىن تالقىلاۋ بارىسىندا ءتيىمسىز ينۆەستيسيالاردى قىسقارتىپ، تابىسى جوعارى ينۆەستيسيالارعا اۋىستىرۋدىڭ ماڭىزدىلىعىن اتاپ ءوتتى.

– ءبىز نەگىزگى ماقساتتاردى قوردىڭ 2028 جىلعا دەيىنگى جاڭارتىلعان دامۋ ستراتەگياسىندا ايقىندادىق. ەڭ باستىسى – تاياۋ مەرزىمدە "سامۇرىق-قازىنا" قورىنىڭ جۇمىسىن جاڭا فورماتقا كوشىرىپ، جەتەكشى تاۋەلسىز ءال-اۋقات قورلارى سياقتى ينۆەستحولدينگە اينالدىرۋ. بىزگە قوردىڭ پورتفەلىندەگى اكتيۆتەردى گەوگرافياسى مەن سالاسىنا قاراي ءارتاراپتاندىرۋ كەرەك. ءتيىمسىز ينۆەستيسيالاردان ارىلىپ، ولاردى بارىنشا تابىس اكەلەتىن ينۆەستيسياعا اۋىستىرۋ قاجەت. بۇل ديۆيدەندتەردىڭ ءوسۋى ەسەبىنەن بيۋدجەتكە تۇسەتىن تۇسىمدەردى ۇلعايتۋعا مۇمكىندىك بەرەدى، – دەدى "سامۇرىق-قازىنا" ۇلتتىق ءال-اۋقات قورىن باسقارۋ جونىندەگى كەڭەستىڭ ءتوراعاسى.

سونىمەن قاتار نازاربايەۆ داعدارىس جاعدايىندا ۇكىمەت وتاندىق بيزنەستى قورعاۋ ءۇشىن تەڭدەسسىز شارالار قابىلداعانىن اتاپ ءوتتى.

– توتەنشە جاعداي كەزەڭىندە حالىق پەن بيزنەستى قولداۋ، ەكونوميكالىق تۇراقتىلىقتى ساقتاۋ ءۇشىن داعدارىسقا قارسى شارالاردىڭ ءۇش بىردەي توپتاماسى قابىلداندى. ءبىراق پاندەميا باسەڭدەر ەمەس. ونىڭ ەكىنشى كەزەڭى بولجانۋدا. مۇنداي كۇردەلى جاعدايدا بۇعان دەيىن اتاپ وتكەندەي، وتاندىق كاسىپكەرلەرگە قولداۋ كورسەتۋ قاجەت، – دەدى ەلباسى.

"سامۇرىق-قازىنا" اكسيونەرلىك قوعامىنىڭ باسقارما ءتوراعاسى ا.ەسىموۆتىڭ اقپاراتىن تىڭداي كەلە، نۇرسۇلتان نازاربايەۆ بيزنەس بەلسەندىلىكتىڭ كۇرت تومەندەۋى جاعدايىندا كۆازيمەملەكەتتىك سەكتوردىڭ مەملەكەتتىك تاپسىرىستارى مەن ساتىپ الۋلارى وندىرىستىك كاسىپورىندارعا جانە كاسىپكەرلەرگە كومەك كورسەتۋدىڭ ءتيىمدى شاراسىنا اينالعانىن اتاپ ءوتتى.

– 2018-2020 جىلدار ارالىعىندا قوردىڭ ساتىپ الۋىنىڭ 93 پايىزى، ياعني جالپى سومماسى ءبىر تريلليون تەڭگەدەن اساتىن 4200 پوزيسيا باسەكەلەستىك ورتاعا بەرىلدى. 23 مىڭعا جۋىق كاسىپكەرلىك سۋبەكتىلەر ساتىپ الۋعا تىكەلەي قول جەتكىزدى. وسى كەزەڭدە ءبىر كوزدەن ساتىپ الۋ 60 پايىزعا ازايعان. ناتيجەسىندە 400 ميلليارد تەڭگەدەن استام قارجى ۇنەمدەلدى. وسى جۇمىستى جالعاستىرۋ كەرەك، – دەدى قوردى باسقارۋ جونىندەگى كەڭەستىڭ ءتوراعاسى.