بەلورۋس پرەزيدەنتى الەكساندر لۋكاشەنكو شەتەل ساياساتتانۋشىلارىنا بەرگەن سۇحباتىندا بەلارۋستەگى وقيعالار پوستكەڭەستىك كەڭىستىكتەگى باسقا ەلدەر ءۇشىن ماڭىزدى ساباق بولۋى كەرەك ەكەنىن ايتىپ، قازاقستاندى ەشقانداي جاعدايدا "ەركىنسىپ كەتپەۋگە" شاقىردى.
كەزدەسۋ بارىسىندا ول الەمنىڭ ءارتۇرلى ايماقتارىنداعى وقيعالار تىزبەگى تۋرالى ايتتى.
ونىڭ سوزىنشە، اقش بارلىق جەردە پرەزيدەنت سايلاۋىنا ارالاسىپ كەلەدى.
– ول تۋرالى نە دەيىن! قازاقستان ونداي جاعدايدىڭ ءبىرازىن باسىنان وتكەرگەن، ءبىراق باق-تا ول باسقاشا كورىنىس تاپتى. سول كەزدە ءار ءتۇرلى باندالار وڭتۇستىكتە دە، شىعىستا دا سوعىسقان. بۇل ءالى دە بولادى. سوندىقتان ەشقانداي جاعدايدا ەركىنسىپ كەتۋگە بولمايدى. بەلارۋس قازاقستان ءۇشىن ماڭىزدى ساباق. سەبەبى قازاقستان مەن رەسەي بەلارۋس ەمەس. بۇل ۇلكەن ەلدەر. ەگەر الدىن-الا جۇمىس جاساماسا، وندا بۇل "ينفەكسيانى" جەڭۋ قيىن بولادى،– دەدى لۋكاشەنكو.
لۋكاشەنكونىڭ ايتۋىنشا، بەلارۋستەگى نارازىلىقتارعا ەشقانداي سەبەپ بولعان جوق.
ەستەرىڭىزگە سالا كەتەيىك، 9 تامىزدا بەلارۋستەگى پرەزيدەنت سايلاۋىنان كەيىن ازاماتتاردىڭ جاپپاي نارازىلىق اكسيالارى باستالعان. سايلاۋدا لۋكاشەنكو التىنشى رەت جەڭىسكە جەتكەن ەدى. وپپوزيسيا وكىلدەرى كانديدات "سۆەتلانا تيحانوۆسكايا جەڭدى" دەپ سانايدى جانە جاڭا سايلاۋ تاعايىنداۋدى تالاپ ەتەدى.
پىكىر قالدىرۋ