جۇمىس ىزدەپ جۇرگەن ادام بوس جۇمىس ورىندارىن ەلەكتروندى اقپاراتتىق جۇيە ارقىلى تابادى. بۇل تۋرالى ۇكىمەت وتىرىسىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى.
– جۇمىسپەن قامتۋ سالاسىندا ەلەكتروندى ەڭبەك بيرجاسىنىڭ مۇمكىندىكتەرىن كەڭىنەن پايدالانۋ كوزدەلەدى. بۇگىنگى تاڭدا جۇمىس ىزدەپ جۇرگەن ادام جۇمىسپەن قامتۋ ورتالىعىنا بارىپ، كەزەككە تۇرىپ، ءتيىستى جۇمىس تاڭداۋ ءۇشىن ورتالىق قىزمەتكەرىمەن بايلانىس جاساۋعا ءماجبۇر. ەندىگى كەزدە بارلىق جۇمىسپەن قامتۋ شارالارى، قۇرالدارى، بوس جۇمىس ورىندارى ەلەكتروندى ەڭبەك بيرجاسىندا قالىپتاسادى. پورتال جۇمىس ىزدەپ جۇرگەن ادامعا داعدىلارىنا سايكەس اۆتوماتتى تۇردە بوس جۇمىس ورىندارىن، "ەڭبەك" باعدارلاماسى قۇرالدارىن ۇسىناتىن بولادى. شەشىمدى اقپاراتتىق جۇيە قابىلدايدى، – دەدى مينيستر.
مينيستر جۇمىس تابىلماعان جاعدايدا اقپاراتتىق جۇيەنىڭ اتقاراتىن قىزمەتىن دە اتاپ ايتتى.
– جۇمىس تابىلماعان جاعدايدا اقپاراتتىق جۇيە اۆتوماتتى تۇردە ادامدى جۇمىسسىز رەتىندە تىركەيدى. وعان جۇمىسسىزدىققا بايلانىستى ءتيىستى الەۋمەتتىك تولەمدى پرواكتيۆتى تۇردە ەسەپتەپ، تاعايىندايدى. وسىلايشا بىرنەشە قىزمەتتى بىرىكتىرىپ، بيزنەس پروسەسىن جەڭىلدەتىپ جاتىرمىز. ءبىز سيفرلىق جۇمىسپەن قامتۋ ورتالىقتارىنا كوشۋ جولىندامىز، – دەدى نۇرىمبەتوۆ.
پىكىر قالدىرۋ