ءماجىلىس پەن ءماسليحاتتار دەپۋتاتتارىن سايلاۋدا پارتيالار ەمەس قازاق ءتىلى جەڭىسكە جەتۋگە ءتيىس. بۇل تۋرالى "قازاق ادەبيەتى" گازەتىنىڭ باس رەداكتورى داۋرەن قۋات ايتتى، دەپ حابارلادى قازاقپارات.

– الەمدە بىزدەن باسقا ەلدە مەملەكەتتىك ءتىل نەمەسە ءتىل تۋرالى ماسەلە جوق. 175 ەلدە رەسمي ءتىل مويىندالادى ەكەن. "رەسمي ءتىل" دەپ جەرگىلىكتى ءتىل ايتىلادى. ال تابيعاتى، تاريحى بويىنشا ورىس ءتىلى – رەسمي ءتىل ەمەس. باسقا ەلدەر ءوزىنىڭ قۇرامىنداعى ەلدەردىڭ تىلدەرى جويىلىپ كەتپەس ءۇشىن قامقورلىق جاسايدى. سولارعا زاڭمەن كومەك كورسەتەدى. ال ءبىز ءالى كۇندە ءوزىمىزدىڭ ءتىلىمىزدى وسىنداي رەسمي جيىنداردا مويىنداتا الماي كەلەمىز. ءتىپتى، وزگەگە ەمەس وزىمىزگە ءوزىمىز مويىنداتا الماي وتىرمىز. مۇنى توقتاتۋ كەرەك، – دەدى ول "اۋىل" حالىقتىق-دەموكراتيالىق پاتريوتتىق پارتياسىنىڭ كەزەكتەن تىس XVIII سەزىندە.

سونىمەن قاتار ول الداعى ءماجىلىس پەن ءماسليحاتتار دەپۋتاتتارىن سايلاۋدا قازاق ءتىلى جەڭىسكە جەتۋگە تيىستىگىن باسا ايتتى.

– سايلاۋعا بارلىق پارتيا اتسالىسىپ جاتىر. ءبارى جەڭىسكە جەتكىسى كەلەدى. مەنىڭشە، بۇل سايلاۋدا قازاق ءتىلى جەڭىسكە جەتۋى كەرەك. زاڭ شىعارۋشى ورگانعا قازاق ءتىلى بارۋعا ءتيىس،  – دەدى داۋرەن قۋات.