سوتتالعان ادامعا جۇمىس تابۋ وڭاي ەمەس. ءبىراق سەرگەي وسىنداي قيىندىقتى جەڭە ءبىلدى. ول كوپتەن بەرى ءوزىنىڭ ويلاپ جۇرگەن ماقساتىن جۇزەگە اسىرۋ ءۇشىن ارنايى كۋرستان ءوتىپ، شاعىن بيزنەس باستاۋ ءۇشىن گرانت ۇتىپ الدى.

الماتى قالاسى بويىنشا قاجد وكىلدەرىنىڭ مالىمەتى بويىنشا سەرگەي جول-كولىك اپاتىن جاساعانى ءۇشىن قىلمىستىق جازاعا تارتىلىپتى. جازاسىن وتەپ شىققان سوڭ جۇمىسقا تۇرۋ ءۇشىن سوتتىلىعى كوپ كەدەرگى بولعانى راس. بىردە ول تۇركسىب اۋداندىق پروباسيا قىزمەتىنىڭ باستىعى  ادىلەت كاپيتانى ميرلان اقساقالوۆپەن اڭگىمەلەسىپ وتىرىپ،جۇمىسسىز ادامدارعا بيزنەس باستاۋ ءۇشىن مۇمكىندىك بەرەتىن مەملەكەتتىك باعدارلاما بار ەكەنىن بىلەدى.

«مەن ءومىرىمنىڭ كوبىن ۇلكەن جۇك كولىكتەرىن جۇرگىزۋمەن وتكىزدىم. ەلىمىزدىڭ بارلىق جەرىندە جانە ودان تىس جەرلەردە دە بولدىم. ءبىراق 2018 جىلى باقىتسىز جاعداي بولدى...مەن جول اپاتىن جاسادىم. تەرگەۋ قورىتىندىسى مەن سوتتىڭ ۇكىمى بويىنشا باس بوستاندىعىم مەن جۇرگىزۋشى كۋالىگىمنەن ايىرىلدىم. الايدا بوساپ شىققان سوڭ مەن قالايدا اقشا تابۋ جانە وتباسىمدى اسىراۋ ءۇشىن كوپ ويلانباي ءارتۇرلى جۇمىستار ىستەدىم. ال، تەگىن كۋرس وقىپ، ءوزىڭنىڭ كاسىبىڭدى باستاۋ ءۇشىن اقشا الۋعا بولاتىنىن ەستىگەندە بىردەن سول كۋرسقا تىركەلدىم. مەن ەشقانداي قام-قارەكەتسىز ديۆاندا جاتاتىن، ىشىمدىككە سالىناتىن، ءوزىنىڭ ءومىرىن ءوزى تالقان ەتەتىن ادامداردى تۇسىنبەيمىن. قانداي مۇمكىندىكتىڭ بولسا دا جالىنا جارماسۋ كەرەك دەپ ويلايمىن»-دەيدى سەرگەي.

بۇرىنعى سوتتالعان «اتامەكەن» ۇلتتىق كاسىپكەرلەر پالاتاسى وتكىزەتىن «باستاۋ بيزنەس» جوباسى بويىنشا كاسىپكەرلىك نەگىزدەرى» كۋرسىن ونلاين فورماتتا وقىپ، ءبىتىردى. كاسىپكەرلىك داعدىلارىن ۇيرەندى، بيزنەس-جوبا جاسادى، ونى كوميسسيانىڭ الدىندا جاقسى قورعاپ شىقتى.

«مەن دۇرىس شەشىم قابىلداپ، ءوز ءىسىمدى باستاعانىما قۋانىشتىمىن. نەگىزىندە مەن بۇرىننان ەت ىستاۋمەن اينالىساتىنمىن، ال ءقازىر بۇل ىسپەن كاسىبي تۇرعىدا اينالىسامىن دەپ شەشتىم. ءقازىر قالاداعى 7 دۇكەنگە ءوز ونىمدەرىمدى وتكىزەمىن، ءوزىمنىڭ ساتىپ الۋشىلارىم پايدا بولدى. ولار مەنى ىزدەپ، قوڭىراۋ شالىپ تۇرادى»-دەيدى سەرگەي.

ول گرانت بويىنشا بەرىلگەن اقشاعا پەش پەن شيكىزات ساتىپ العان بولاتىن.