توتەنشە جاعدايلار مينيسترلىگى نۇر-سۇلتان قالاسىندا ءدامحانادا بولعان جارىلىس تۋرالى قوسىمشا اقپارات جاريالادى.
مينيسترلىك باسپا ءسوز قىزمەتىنىڭ مالىمەتىنشە، 21 قاراشادا ساعات 12:25-تە نۇر-سۇلتان قالاسى توتەنشە جاعدايلار دەپارتامەنتى كەزەكشى-ديسپەچەرلىك قىزمەتىنىڭ پۋلتىنە شۇبار شاعىن اۋدانىنداعى "Halalbrothers" ءدامحاناسىندا گاز باللون جارىلىپ، ءورت شىققانى تۋرالى حابارلاما تۇسكەن.
ءورت سوندىرۋشىلەر وقيعا ورنىنا ساعات 12:32-دە كەلگەن بويدا جارىلىس سالدارىنان ەكى قاباتتى كوتتەدجگە جاپسارلاس سالىنعان قۇرىلىس پەن قازاندىقتىڭ ءىشىنارا قابىرعالارى جانە شاتىرى قۇلاعانى انىقتالدى. سونىمەن قاتار 20 شارشى مەتر كولەمدە جاپسارلاس سالىنعان قۇرىلىس پەن قازاندىقتىڭ شاتىرى جانعان. قۇرىلىستىڭ 100 شارشى مەترى (جالپى كولەمى 600 شارشى مەتر) قيراعان. جارىلىس سالدارىنان اس ءۇيدىڭ شاتىرى قۇلاعان.
مينيسترلىكتىڭ باسپا ءسوز حاتشىسى تالعات ءۋاليدىڭ ايتۋىنشا، قۇتقارۋشىلار وقيعا ورنىنان 35 گاز باللوندى الىپ شىققان.
"ەلوردالىق قۇتقارۋشىلار وقيعا ورنىنان 35 گاز باللوندى شىعاردى. ءۇيىندىنىڭ اراسىنان 1998 جىلى تۋعان قىزدى قۇتقاردى، ول جابىق باس مي زاقىمىن العان. وكىنشكە قاراي، وقيعا ورنىندا ءدامحانادا ىدىس جۋۋشى بولىپ قىزمەت اتقاراتىن 1968 جىلى تۋعان ايەل ادام قازا تاپتى.
جەدەل مەديسينالىق كومەك بريگاداسى 34 ادامدى ەمحاناعا جەتكىزدى. ونىڭ ىشىندە 11ء-ى دارىگەر قاراعاننان كەيىن ۇيلەرىنە جىبەرىلدى، 23ء-ى اۋرۋحاناعا جاتقىزىلدى. زارداپ شەككەن ادامداردىڭ بارلىعى ءدامحانا جۇمىسشىلارى. سونداي-اق جارىلىس سالدارىنان 3 اۆتوكولىك زيان كەلتىرىلدى" دەپ جازدى ول facebook پاراقشاسىندا.
كولەمى 20 شارشى مەتر ءورت ساعات 12:58-دە ءسوندىرىلدى. اۆاريالىق-قۇتقارۋ جۇمىستارى ساعات 16:59-دا اياقتالدى. ءورتتىڭ شىعۋ سەبەپتەرى انىقتالىپ جاتىر.
"وقيعا ورنىندا نۇر-سۇلتان قالاسى توتەنشە جاعدايلار دەپارتامەنتى، اپاتتار مەديسيناسى ورتالىعىنىڭ 56 قىزمەتكەرى مەن 14 بىرلىك تەحنيكاسى جۇمىس جاسادى. قالا اكىمدىگى جانە توتەنشە جاعدايلار دەپارتمەنتى ادامدار توڭىپ قالماس ءۇشىن كۋنگ-كولىگى مەن اۆتوبۋسىن جىبەردى" دەلىنگەن حابارلامادا.
