قاراشانىڭ 21ء-ى كۇنى ارمەنيا استاناسى ەريەۆان قالاسىنداعى بارلىق ميتينگتەر توقتاتىلدى. Ria.ru اقپارات اگەنتتىگى سول جيىندا سويلەگەن وپپوزيسيونەر، "رودينا" ارميان پارتياسىنىڭ ءتوراعاسى ارتۋر ۆانەسياننىڭ مالىمدەمەسىن ۇسىندى. 

ارتۋر ۆانەسيان "الدا ءبىزدى كۇردەلى ماسەلەلەر كۇتىپ تۇر، نيكول پاشينيان بۇل ماسەلەلەردى شەشە الا ما؟" دەپ جينالعان حالىققا سۇراق قويىپ، ارى قاراي مالىمدەمەسىن جالعاستىردى. 

– مەن پاشينياننىڭ جالعان مالىمدەمەلەرىن ۇسىنعىم كەلەدى. ول "ەگەر مەنىڭ وتستاۆكاعا كەتۋىمە قول جەتكىزىلسە، وندا قول قويىلعان مالىمدەمە جارامسىز دەپ جاريالانىپ، سوعىس باستالادى" دەيدى. ءبىزدىڭ سوعىستى قايتا باستاۋعا نيەتىمىز جوق. ءبىز جەڭىلگەن كوشباسشىنىڭ وسى مالىمدەمەسىنىڭ ناتيجەسى بويىنشا جاسالعان كەلىسىم ەلدىڭ مۇددەلەرىن بىلدىرە المايدى دەپ ەسەپتەيمىز.

تاعى بىردە پاشينيان "مەنىڭ جەڭىلگەنىم ەشتەڭە ەمەس. مەنىڭ اقىماقتىعىمنان كوپ ادامنىڭ مەرت بولعانى تۇك ەمەس. مەن كەتسەم مەنىڭ ورنىما بۇرىنعى ادامدار كەلەدى" دەپ مالىمدەمە جاسادى. ونىڭ بۇل ءسوزى دۇرىس پا؟! بۇل – جالعان ءسوز. وتكەنگە ورالۋ جوق. ءبىز جاڭا جۇزدەرمەن، جاڭا يدەيالارمەن جانە جاڭا كوزقاراستارمەن بولاشاققا قاراي قادام جاسادىق، – دەدى وپپوزيسيونەر ارتۋر ۆانەسيان. 

وپپوزيسيونەر سوعىستى نيكول پاشينياننىڭ ءوزى قوزدىرعانىن اتاپ ءوتتى.

ارتۋر ۆانەسيان قاڭتار ايىندا پرەمەر-مينيستردىڭ وتستاۆكاعا كەتۋىن تالاپ ەتكەنىن، ال 8 قازاندا ءۇش وپپوزيسيالىق پارتيا پرەمەر-مينيستردىڭ وتستاۆكاعا كەتۋىن تالاپ ەتىپ ميتينگ وتكىزگەنىن ەسكە سالدى.