پرەزيدەنت قاسىم-جومارت توقايەۆ الماتىدا اعاشتاردى كەسكەن كىنالىلەردى جاۋاپكەرشىلىككە تارتۋدى تاپسىردى. بۇل تۋرالى ق ر مەملەكەت باسشىسىنىڭ باسپا ءسوز حاتشىسى بەرىك ءۋالي Facebook-تەگى پاراقشاسىندا جازدى.
– پرەزيدەنت الماتى قالاسى تولە بي كوشەسىندەگى اعاشتاردىڭ وتالعانىنا قاتىستى جاعدايعا نازار اۋداردى. قالا اكىمى باقىتجان ساعىنتايەۆقا اتالعان جاعدايعا بايلانىستى قىزمەتتىك تەكسەرۋ جۇرگىزىپ، كىنالىلەردى جاۋاپكەرشىلىككە تارتۋدى تاپسىردى. مەملەكەت باسشىسى 2019 جىلى 29 قازاندا الماتىدا قالا پروبلەمالارىنا ارنالعان كەڭەستە سويلەگەن سوزىندە مەگاپوليستىڭ ەكوجۇيەسىنە ۇقىپتى قاراۋدىڭ، شاھار تۇرعىندارىنىڭ جايلى ءومىر ءسۇرۋىن قامتاماسىز ەتۋ ءۇشىن ءتيىستى جاعدايلار جاساۋدىڭ ەرەكشە ماڭىزدى ەكەنىن مالىمدەگەن بولاتىن، – دەدى بەرىك ءۋالي.
