قازىرگى تاڭدا ەلدە كىتاپحانالارداعى كىتاپتاردى جانە ارحيۆتەردەگى قۇجاتتار مەن جازبالاردى ساقتاۋ، سيفرلاندىرۋ ىسىندە ايتارلىقتاي ولقىلىقتار بار. سەناتور نۇرتورە ءجۇسىپ پرەمەر-مينيستردىڭ ورىنباسارى ەرالى توعجانوۆتىڭ اتىنا جولداعان دەپۋتاتتىق ساۋالىندا وسى ماسەلەنى كوتەردى، دەپ حابارلادى سەناتتىڭ باسپا ءسوز قىزمەتى.

سەناتوردىڭ ايتۋىنشا، بۇگىندە وتاندىق كىتاپحانالار مەن مۇراعاتتاردا قۇجاتتار مەن جازبالاردى ساقتاۋ ىسىنە جەتكىلىكتى كوڭىل بولىنبەيدى. ءتىپتى ەلورداداعى ۇلتتىق ارحيۆكە قاراستى قولجازبالار مەن سيرەك كىتاپتار ۇلتتىق ورتالىعىندا قولجازبالار مەن سيرەك كىتاپتار ساقتايتىن جەر وتە تار.

– قور كوبەيگەن سايىن، عيماراتقا سىيماي بارادى. ورتالىقتىڭ عيماراتى ەۋروپالىق تالاپتارعا مۇلدەم ساي ەمەس. ونىڭ ۇستىنە، كورەرمەندەرگە ارناپ دايىنداعان كورمەسى دە كىشكەنتاي. سوندىقتان كىتاپ قورى كوبەيگەن سايىن ورتالىقتا عىلىمي ساراپتامالىق توپتى ۇلعايتۋ كەرەك، – دەدى نۇرتورە ءجۇسىپ.

ساۋال بارىسىندا سەناتور ەلدەگى رەستاۆراسيا سالاسىن جەتىلدىرۋ، وسى باعىتتا مامان دايارلاۋ، ايماقتارداعى ارحيۆتەردىڭ جاعدايىن جاقسارتۋ ماسەلەلەرىنە دە نازار اۋداردى.

سونىمەن قاتار ول كىتاپتار مەن قۇجاتتاردى سيفرلاندىرۋ ءىسى كوڭىل كونشىتپەيتىنىن ايتتى.

– كوپشىلىگىنىڭ ساپاسى ناشار جانە وقىلۋى قيىن. جۇكتەپ الۋعا دا كەلمەيدى. ەگەر كىتاپتاردىڭ وقىلىمىن تەگىن ەتىپ، جۇكتەۋىن اقىلى ەتەر بولسا، بۇل ولاردىڭ ماتەريالدىق جاعدايىن جاقسارتۋعا مۇمكىندىك بەرەر ەدى. Aرحيۆتەردە مۇنداي مۇمكىندىكتەر ءالى قاراستىرىلماعان. وبلىستارداعى كەي ارحيۆتەردىڭ سايتى دا جوق. شەت ەلدەردەگىدەي ارحيۆ قۇجاتتارىمەن ونلاين تانىسۋ مۇمكىن ەمەس، – دەگەن دەپۋتات سونىڭ سالدارىنان پاندەميا كەزىندە ەلىمىزدەگى عىلىمي جۇمىستار ايتارلىقتاي زارداپ شەككەنىن جەتكىزدى.

سەناتور بۇل ماسەلەلەردى مادەنيەت جانە سپورت مينيسترلىگى مەن ءبىلىم جانە عىلىم مينيسترلىگى بىرلەسە قولعا الىپ، جەتىلدىرۋ كەرەكتىگىن تىلگە تيەك ەتتى. سونداي-اق ەلدە قولجازبالار، سيرەك كىتاپتار، باسقا دا قۇندى قۇجاتتاردى سيفرلاندىرىپ، ولاردىڭ قولجەتىمدىلىگىن قامتاماسىز ەتۋ جانە حالىقتىڭ قاجەتىنە جاراتۋ قاجەت ەكەنىن اتاپ ءوتتى.