25 قاراشا كۇنى فرانسيا سەناتى "تاۋلى قاراباق رەسپۋبليكاسىنىڭ" تاۋەلسىزدىگىن مويىنداۋ تۋرالى قارار قابىلدادى. قۇجاتتى قولداپ 305 سەناتور داۋىس بەرسە، 1 سەناتور عانا قارسى داۋىس بەرگەن. Ria.ru سايتىنىڭ مالىمەتىنشە، سەناتورلاردىڭ قاراردىڭ قابىلدانۋىنا "تاۋلى قاراباقتاعى ارميان حالقىنىڭ قاۋىپسىزدىگى مەن بوستاندىعىنا ازەربايجان كەپىلدىك بەرمەيدى" دەپ ساناعاندىعى تۇرتكى بولعان. ال ازەربايجان پرەزيدەنتىنىڭ اپپاراتى اتالمىش قارار قاراپايىم قاعازبەن تەڭ ەكەنىن مالىمدەدى. بۇل تۋرالى aze.az سايتى حابارلادى.

25 قاراشادا فرانسيا سەناتىنىڭ ءتورالقاسىندا ارميان دياسپوراسىنىڭ ىقپالىنداعى ءبىر توپ سەناتورلار "تاۋلى قاراباق رەسپۋبليكاسىن" تانۋ قاجەتتىلىگى تۋرالى #145 قارار جوباسىن ۇسىندى. قابىلدانعان رەزوليۋسيادا سەناتورلار "ازەربايجاننىڭ تۇرىك بيلىگى مەن شەتەلدىك جالدامالىلاردىڭ قولداۋىمەن جۇزەگە اسىرعان اسكەري اگرەسسياسىن" ايىپتاعان. وعان قوسا 27 قىركۇيەكتەن بەرى تاۋلى قاراباقتا جۇرگىزىلىپ جاتقان ۇرىس قيمىلدارى ناتيجەسىندە ازەربايجان قارۋلى كۇشتەرى مەن ولاردىڭ جاقتاستارىن باسىپ العان تەرريتوريالاردان تەز ارادا شىعارۋعا شاقىرادى.

"سەنات ۇكىمەتتى تاۋلى قاراباقتىڭ بەيبىت تۇرعىندارىنا گۋمانيتارلىق دالىزدەر اشۋدى تالاپ ەتىپ، جاپپاي گۋمانيتارلىق كومەك كورسەتۋگە شاقىرادى" دەلىنگەن قۇجاتتا.

ازەربايجان پرەزيدەنتىنىڭ كومەكشىسى حيكمەت گادجييەۆتىڭ ايتۋىنشا، فرانسيا سەناتىنىڭ 30 جىل ىشىندە حالىقارالىق دەڭگەيدە تانىلعان ءازىربايجان تەرريتوريالارىن باسىپ الۋعا، بەيبىت تۇرعىنداردى ولتىرۋگە، ەتنيكالىق تازارتۋعا، ەكولوگيالىق تەررورعا، جەرگە زاڭسىز قونىستانۋعا جانە زاڭسىز ەكونوميكالىق قىزمەتكە قاتىستى ءۇنسىز ۇستانىمىن كورسەتۋى ۇلكەن وكىنىش تۋدىرادى.

– بىرىنشىدەن، ءبىز ازەربايجان ءۇشىن بۇل قارار قاراپايىم قاعازدان باسقا ەشنارسە ەمەس ەكەنىن باسا ايتقىمىز كەلەدى. وزدەرىنىڭ كىشكەنتاي ساياسي امبيسيالارىنا بەرىلىپ، قابىلدانعان بۇل قاعاز حالىقارالىق قۇقىقتى، بۇۇ قارارىن جانە بۇۇ قاۋىپسىزدىك كەڭەسىنىڭ ءتيىستى قاۋلىلارىن ورەسكەل بۇزۋمەن تەڭ. سونداي-اق مينسك توبىنىڭ تەڭ ءتوراعاسى جانە فرانسيانىڭ بۇۇ قاۋىپسىزدىك كەڭەسىنىڭ تۇراقتى مۇشەسى رەتىندەگى قىزمەتىنە بايلانىستى ماڭىزدى سۇراقتاردى تۋىنداتىپ وتىر، – دەدى گادجييەۆ فرانسيا سەناتىندا قاراباقتى تانۋ تۋرالى قارار جوباسىن قابىلداۋعا قاتىستى تۇسىندىرمەسىندە.

گادجييەۆ قاراردى فرانسياداعى يسلاموفوبيانىڭ كۇشەيۋىنىڭ ايقىن مىسالى دەپ سانايدى. ونىڭ ايتۋىنشا، شەتەلدەن جالدانعان لاڭكەستەردىڭ ۇرىس قيمىلدارىنا قاتىسقانى تۋرالى ەشقانداي دالەل كەلتىرىلمەگەن.

– ءبىز بۇل قاراردىڭ قابىلدانۋىن فرانسۋز ساياساتى ءۇشىن وتە ۇيات قادام دەپ سانايمىز. فرانسيا ۇكىمەتى مۇنداي ارانداتۋشىلىق قادامدارعا جول بەرىلمەيتىنى تۋرالى رەسمي ۇستانىمىن ءبىلدىرىپ، قاراردى ايىپتاي وتىرىپ، ءازىربايجاننىڭ تەرريتوريالىق تۇتاستىعىن قولدايتىنىن ءبىلدىرۋى كەرەك، – دەدى ازەربايجان پرەزيدەنتىنىڭ كومەكشىسى ءسوزىن تۇيىندەپ.

ءقازىر ازەربايجاندىق ساراپشىلار فرانسيانى ازەربايجانداعى مۇناي جانە گاز سالاسىنان شىعارىپ تاستاۋعا شاقىرىپ جاتىر. سونداي-اق ونى "مينسك توبىنان" دا الىپ تاستاۋ كەرەك دەگەندى العا تارتىپ وتىر. كەيبىرى ازەربايجان جەرىنەن بارلىق فرانسۋز كومپانيالارىن قۋىپ شىعۋدى ۇسىنۋدا.

Aze.az باسىلىمىنىڭ دەرەگىنشە، فرانسيا تاراپىنان ءدال وسى قولداۋ ءتۇرى ونسىز دا اگرەسسيۆتى ارمەنيانىڭ بۇرىنعى ارەكەتتەرىن جالعاستىرۋعا جانە باسىپ الۋ فاكتىسىن نىعايتۋعا يتەرمەلەگەن.