اقش-تاعى ميسسۋري شتاتىنىڭ دارىگەرى ادامدارعا ماسكا كيىپ ءجۇرۋدىڭ ماڭىزىن ءتۇسىندىرۋ ماقساتىندا كوروناۆيرۋس ينفەكسياسىنان ءولىپ بارا جاتقان ادامعا مەديسينالىق كومەك كورسەتىپ جاتقانداي ۆيدەو ءتۇسىردى.

كەننەز رەمي "ماسكا كيۋ وكپەگە جاساندى جەلدەتكىش ورناتقانداي ىڭعايسىزدىق تۋدىرمايدى. بۇل ۆيدەونى تۇسىرۋىمە ناۋقاستاردىڭ ءولىمى ارىپتەستەرىمە قالاي اسەر ەتكەنىن كورگەننەن كەيىن تۋىندادى" دەيدى.

دارىگەر ۆيدەودا Covid-19-بەن اۋىراتىن ادامنىڭ قالاي دەمالاتىنىن كورسەتكەن. ناۋقاستىڭ جاعدايى ناشارلاعاندا 1 مينۋتتا 40 رەت قانا دەم الا الادى. "ءسىزدىڭ ومىرىڭىزدەگى ەڭ سوڭعى كۇن ءدال وسىلاي قورقىنىشتى اياقتالمايدى دەپ ۇمىتتەنەمىن" دەيدى ۆيدەودا.

ناۋقاسقا اۋا جەتپەي قينالعاندا كوبىنە دارىگەردەن وتباسىنا ولاردى جاقسى كورەتىنىن ايتۋدى سۇرايدى ەكەن. سەبەبى قينالعاندا ءتىرى قالاتىنا كۇماندانا باستايدى. دارىگەردىڭ ايتۋىنشا مينۋتىنا 40 رەت تىنىس الاتىن جاعدايعا جەتكەندەر كوبىنە امان قالمايدى. ناۋقاستاردىڭ اۋىر ءولىمى دارىگەر، مەدبيكەلەرگە اسەر ەتپەي قويمايدى.

– ارىپتەستەرىمنىڭ فيزيكالىق جانە مورالدىق تۇرعىدا قالاي شارشاعانىن كورىپ ءجۇرمىن. مەديسينالىق قۇرالداردى الىپ ناۋقاستىڭ بولمەسىنە كىرگەندە ونداعى اۋىر جاعدايعا كۋا بولعاننان كەيىن سونداي ساتتەردى ۆيدەو ارقىلى بايانداۋدى ۇيعاردىم. ەگەر قوعامدىق جەردە ماسكا كيمەسەڭىز، اراقاشىقتىقتى ساقتاماساڭىز، قولىڭىزدى ءجيى جۋماساڭىز ءومىرىڭىز ءدال ۆيدەوداعىداي اياقتالادى.  

دارىگەر كوروناۆيرۋستان كوپ ادام ءتىرى قالاتىنىن دا جوققا شىعارمايدى، ءبىراق اۋرۋحاناعا جاتقىزىلىپ، وكپەگە جاساندى اپپارات قويىلسا، امان قالۋ ەكى تالاي دەپ ەسكەرتەدى.

–  مەن سىزدەرگە ەكى نارسەنى ەسكەرتەمىن. بىرىنشىدەن، ماسكا كيۋ وكپەگە پلاستماسس اپپاراتىن ورناتقانعا قاراعاندا الدە قايدا جەڭىل ءارى وڭاي. اۋرۋدان ءولىپ قالساڭىز ەركىندىكتىڭ قۇنى ءبىر تيىن. ەكىنشىدەن، ەگەر ءسىز نەمەسە ءسىزدىڭ اتا-اناڭىز، بالاڭىز وسى اۋرۋعا شالدىقسا، ءسىزدى دە ولاردى دا ءدال وسىنداي ءولىم كۇتىپ تۇر. بۇل –  ويىنشىق ەمەس. سىزدەردەن ءوتىنىپ سۇرايمىن، ساقتىق شارالارىن ۇمىتپاڭىزدار. تەك سولاي عانا اۋرۋدىڭ الدىن الا الامىز، –  دەدى ول.