ارمەنيادا ازەربايجاننان كەك الۋ تۋرالى اڭگىمەلەر ءالى دە جالعاسىپ جاتىر. ءبىراق رەسەيلىك ساراپشى بۇل وي ارميان تاراپىن ودان دا اۋىر جەڭىلىسكە ۇشىراتۋى مۇمكىن دەپ سانايدى. بۇل تۋرالى aze.az سايتى حابارلادى. 

رەسەيدەگى "كوممەرسانت" سىرتقى ساياسات ءبولىمى باسشىسىنىڭ ورىنباسارى، حالىقارالىق ىستەر جونىندەگى كەڭەستىڭ ساراپشىسى الەكسەي ناۋموۆ "ماسكەۋ-باكۋ" پورتالىنا بەرگەن سۇحباتىندا ارمەنيا وتكەن جاعدايلاردىڭ بارىنەن ساباق الۋى كەرەگىن ايتتى. ونىڭ سوزىنشە، ارمياندار ءالى ەش ناتيجە شىعارعان جوق.

– ارمەنيا كىنالىلەردى ىزدەپ جاتقانىن، كەك الۋ تۋرالى كەلىسسوزدەر ءجۇرىپ جاتقانىن ەستىدىك. سوعىستان كەيىن جەڭىلگەن تاراپ ءارقاشان كەك العىسى كەلەدى. دەگەنمەن مەنىڭ ويىمشا، ءقازىر ارميان حالقىنىڭ باستى مىندەتى – وتانداستارىنا كومەكتەسۋ جانە ازىربايجاندارمەن قاتار بەيبىت ءومىر سۇرۋگە بەيىمدەلۋ، جانجالداردى رەتتەۋ قانداي پايدا اكەلەتىنىن ءتۇسىنۋ، – دەدى ناۋموۆ.

ساراپشى ارمەنيانىڭ ءۇشجاقتى كەلىسىمدى ورىندايتىنىنا سەنىمدى. ويتكەنى ارمەنيانىڭ رەسەيگە قارسى شىعۋعا مۇمكىندىگى جوق.

– ەگەر قاندايدا ءبىر راديكال ارمەنيادا بيلىككە كەلسە، ءۇشجاقتى كەلىسىمنىڭ كۇشىن جويۋعا تىرىسادى. ءبىراق ونداي بولعان جاعدايدا ازەربايجان ارمياسى حانكەندي مەن باسقا اۋماقتاردى دا باقىلاۋعا الادى. ءقازىر ارمەنيا ءۇشىن كەلىسىمدى جۇزەگە اسىرۋ ەڭ جاقسى قادام ەكەنى انىق، – دەدى ول.